![[AIM] Asmarino Independent Media](/images/logo/ailogo.png){kind=logo}
ዕዉት ሰላማዊሰልፊ ኣብ ከተማ ሽቱትጋርት።
እቲ ሰልፊ፡ ብመሰረት መደቡ ልክዕ ሰዓት ሓደ ካብቲ ቀንዲ ጎደና ተበጊሱ። ሰልፈኛታት ኣብ ጉዕዞም ንጀርመናውያንን ካልኦት ነበርቲ ናይታ ከተማን ብቛንቋ ጀርመን ዝተዳለወ፡ ንባህርያት ዲክታቶርያዊ ጭፍራ ህግደፍ ዝገልጽ ጽሑፋት እናዓደሉ፡ ብልዑል ድምጺ "ውድቀት ንዲክታቶር እንቢ ንምልኪ፤ ሕራይ ንሰላም እወ ንደሞክራሲ" እናጨርሑን ተእጓዒዞም። ነበርቲ ከተማ ሽቱትጋርት ድማ ብጨብጨባ ሶሊዳሪቲ ብምርኣይ ነቲ ሰልፊ ድምቀት ሂቦሞ።
እቲ ብብርክት ዝበሉ ፖሊስ ዝተዓጀበ ሰልፊ ኣብዝተመደበሉ ናይ ቫድንቩርተንበርግ ናይ ውሽጢ ሚንስተርዩም ቤት ጽሕፈት ብምብጻሕ፡ ብኣካያዲት ሽማግለ ዝተዳለወ ነቲ ዕላማ ናይቲ ሰልፊ ዘንጻባርቕን ዝገልጽን ጽሑፋት ብትግርኛን ጀርመንን ድሕሪ ምንባቡ፡ ብፍሉጣት ናይ ግጥሚ ኣዳለውቲ ደረስቲ ዝተዳለወ ግጥምታት ድሕሪ ቀሪቡ። ንህዝብን መንግስቲን ጀርመን ብሓፈሻ ብፍላይ ድማ ንምምሕዳር ቫድንቩርተንበርግ ንዝገበረልና ምትሕብባርን ስሉጥ ፍቓድን ብምምስጋን፡ እቲ ሰልፊ ብዓወትን ፍናን ዝመላኦን ኮይኑ ብሰላም ተፈጺሙ።
እቲ ሰልፊ ምስ ተወደአ ነቲ መዓልቲ ዝተዳለወ ናይ መበል 48 ዓመት ምጅማር ቃልሲ ህዝቢ ኤርትራ ንምኽባርን ንምዝካርን እቲ ድርብ ወፍሪ ናይቲ መዕልቲ ማለት ብሓንቲ እምኒ ክልተ ዑፍ ምህራም ስለ ዝነበረ ነቲ መዓልቲ ዘንጻባርቕ ብኣካያዲት ሽማግለ ዝተዳለወ ጽሑፍ ድሕሪ ምንባብ ንዝወዓልናዮ መኸተ ንምግምጋምን ንመጻኢ ክምደቡ ዘለዎም ንጸረ ህዝብን ጸረ ደሞልራስን ጭፍራ ህግደፍ ንምእላይን ጠርሹ ካብ ህዝቢ ክንጸልን ክፍንፈንን መሊእና ክንስዕሮን ብኒሕን ሓቦን ሓድሕድ ምክብባርን ሰጢምና ክንሰርሕን ዝብሉ ብልዑል ሓላፍነት ዝመልኦ ልዝብ ብምክያድ እቲ ብዓል ብዓወትን ንቕድሚት ዓቢ ተስፋ ዝህብ ኮይኑ ብሰላም ተዛዚሙ።
ሓደ መስከረም ኣብ ህዝብና ክትዝከር ክትነብር እያ!!!
ውድቀት ንጨቆንትን ገበነኛታትን።
ክብርን ዝኽረን ንጀጋኑ ስዉኣትና።
ካሕሳይ ይሕደጎ።
20/09/09
