ሸውዓተ ብክርስትና እምነቶም ዝተኣሰሩ ኤርትራውያን ኣብ ዊዓ ሞይቶም።

እዚ ዜና ቐጺሉ መንግስቲ ኤርትራ ነዞም ብሕማም ዝተጠቕዑ እሱራትን ናይ ቤት ጽሕፈት ሰራሕተኛታትን ካብ ዊዓ ናብ መጠረ ወተሃደራዊ መዓስከር ክሳብ ዘግዕዞም፣ ካብኣታቶም ሓደ መስፍን ገብረክርስቶስ ዝተባህለ ብሰንኪ ስእነት ክንክንን እቲ ሕማም ዘስዓቦ ድኻምን ብሞት ካብዛ ዓለም ተፈልዩ። መስፍን ሓደ ካብቶም ብእምነቱ ዝተኣሰረ ዜጋ ኔሩ።

መስፍን ገብረክርስቶስ ብዕለት መስከረም 3 ክመውት እንከሎ በዓል ሓዳርን ክልተ ቆልዑን እዩ ገዲፉ። እዚ ሞት እዚ ካብቶም ዛጊት ብእምነቶም ዝሞቱ ክርስትያን 10ይ እዩ ብማለት ጸብጻባት ይሕብሩ። ናይ መስፍን ገብረክርስቶስ እምነት ካብቲ ብመንግስቲ ብወግዒ ዝፍለጣ ሰለስተ ማለት ሉተራን፣ ካቶሊክን፣ ኦርቶዶክስ እምነታት ወጻኢ ስለዝኾነ እዩ ኣብ ማእሰርቲ ክርከብ ኪኢሉ።

ክልተ ሰሙን ይገብር መንግስቲ ኤርትራ ንኹሎም ዜጋታቱ፣ ኣብ ጎረባብቶም ዝኾነ ዘይሕጋዊ ኣኼባ ናይ ክርስትያን እንተድኣ ተኻይዱ፣ ንመንግስቲ ክሕብሩ ጻውዒት ጌሩ ክብል ክፉት ማዕጾ ብተወሳኺ ገሊጹ።

ጸብጻባት ናይ ክፉት ማዕጾ ከምዝሕብሩዎ እቲ ጻውዒት ኣብ ሓደ “ገበን ንምክልኻል ምስ ፖሊስ ምተሕብባር” ኣብ ዝብል ኣኼባ እዩ ተነጊሩ። ሰበ ስልጣን መንግስቲ ኤርትራ ብዘይተምዝገባ እምነታት ዝግበር ዘይሕጋዊ ኣኼባ ገበን ከምዝኾነን፣ ዜጋታት ድማ ነዚ ብኸምኡ ክርድእዎን ካብ ምሕባር ሓሊፎም፣ እዚ ገበን እዚ ከምዘቕጽዕ ነቶም ኣኼበኛታት ነጊሮምዎም።

ኣባላት ናይ ዘይተመዝገባ ናይ ክርስትያን እምነታት ኣብ ስግኣት ይርከቡ። ክፉት ማዕጾ መራሕቲ ናይ እዚኣተን እምነታት ነቶም ኣባላቶም ክተባብዑን እግዚኣብሔር ሓይሊ ክህቦም ምእንቲ ጸሎት ክገብሩ ይነግርዎም ኣለዉ። ተስፋ ኢየሱስ ኣብ ክንዲ እቶም ንባዕሎም ክዛረቡ ዘይክእሉ ዓው ኢሉ ክስማዕ ምእንቲ ጸሎት ይቐጽል ክብል እቲ ዜና ደምዲሙ።