ዝሓዝካ ዘይብልካ ብጎነጽ ፋብሪካ

ፕሮፓጋንዳ ብዛዕባ ትካላት

ዓዲ ዘየሎ ኣራቢሕካ ብሓሶት

ኣገርህ ኣቢሉ ክእክብ ዶላራት

ይኣክል በልዎ ንማፍያ ስርዓት

ንጻዕዳ ሓሶት ናይ ሸፈጥ ወፍሪ

ቅድም ሕሰበሉ ከይኣትወካ ቁሪ

ሽርክነት ህግደፍ ንምሸቱ በትሪ

ልቐቕ ብኣግኡ ሕማም ከይተጥሪ

እንዳ ሜስ ትካላት ካብ በልዎ

ዕዳጋ ከብቲ ኣድጊ ተወሲኹዎ

ከደናግሩ ነኣስመራ ዘይፈለጥዎ

ነዚዮም ፋብሪካታት ዝጽውዕዎ

ዝጠፈሸ ትካል ዓያሹ ክተኽልዎ

እንዳ መሎቲ ቦኽቢኹ ዝኣረገ

ሎሚ ጽባሕ ዝብል ዘሎ ዝሃጎገ

ይጎሓፍ.ምበር እዝዶ ምተዓደገ

ተሰሪዮም ድኣ ብህግደፍ በዓለገ

ባራት እንዳ ስዋ እንዳ ኣመንዝሮ

ዋናጩ ከም ፍርያት ሃገር ዝቖጽሮ

ምዕባለ ክራር ሳዕሲዒት ብኾቦሮ

ፋብሪካ ብዕልግና ዓለም ዘይገበሮ

ኣሓት ተበላሽየን መሲለን ሓሮሮ

ድኽነት በዲላተን ከላእ ትዋፈሮ

ብዕሱባት ህግደፍ ብወቓዕ ኮቦሮ

ደቅና ተደፊረን ንጸላኢና ይግበሮ

ቱሪስቲ ህግደፍ ዓመታዊ መንሽሮ

መላገጺኹም ኮይኑ ድኻ ዝሸገሮ

ከምጽጉብ ህዝቢ ጌሮም  ዘውሪዩ

ሓሰውቲ ገያሾ ተጠውዮም ዘእውዩ

ብሓለንጊ ህግደፍ ዝላደዩ ዝሰልከዩ

ፈራሓት በቲ የጣቕዑ በቲ ይበኽዩ

ክዋጡዩ ክትሰምዖም የሕዝኑኻ

ንሽጉር ህዝቢ ጸጊቦም ዝብሉኻ

ዘይኮነ ዝምሕሉ ብገዛእ ከብድኻ

ናትናዮም ክትብሎም የስጉኡኻ

ሰነፋት ከለዉ ዝብሉ ማዕቢልና

ንድኻ ሃገር ከም ሃብቲ ብልጽግና

ዘይ ራኣይዎ ወርቂ ኣእዛና ጸሚምና

ትቕንጠጥምበር ትሽለምሲ ነይራአና

ብተንተንቲ ህግደፍ ዓይንና ነቝርና

ሙሁራቲና ሊቃውንቲና ካብ በሉና

ዚኣስ ሓቆም ንሲንጋፖር በሊጾማ

ፈጣን ሰረገላ ሰሪሖም ብዘይ ጎማ

ሓዳስ ንDream line  ትቕድማ

ዓለም ደንጺዩዋ ብህግደፍ ተገሪማ

ጠፈር በጺሖም ንኣመሪካ በሊጾማ

ህግደፍ ሓሳቦም ተዝሰምረሎም ኔሩ

ዓለም መጥፍኡዋ በይኖም ክዕንድሩ

ዋላ ነቶም ኣለናካ ዝብልዎም ወኻሩ

ቅድመና ሓመድ ኩዒቶም  ምቐበሩ

ብዛዕባ ዞም ጎሓፋት ክዓጹ ይኣክል

ናብቶም ሰብ ቅያ ጀጋኑ ክዝምብል

ታኣምር ዝሰርሑ ንህዝቢ ዘገልግል

ብስራት ዓወት ዘይርሳዕ ንመዋእል

21 ጥሪ  ናይ ወዲ ዓሊ ጅግንነት

ብስራት ዓወት ዓለም ዘቃልሐት

ከቢድ ቅያ ዘይውዳእ ብጽሕፈት

ንዓና ኣሐጒሳ ንህግደፍ ዘሕዘነት

ታሪኽ ነባሪዩ ትውጋሓልና መሬት

ብማዕዶ ንተጣራጠርቲ ዘበራበረት

ንህግደፍ ዘሰምበደ ታሪኻዊት ዕለት

መንእሰይ ሰጉም ህዝብኻ ከተዐውት

ዕድመ ዝደፋእና ድማ ብሕልና ጸሎት

ኤረና ኩሑሎ ሎም ዘመን ሓዲኡሎ