መልቀስ ንኮለኔል ስዒድ ዓሊ ሕጃይ!!!!!!

ወየ!!!!! ወየ!!!!! ወየ!!!!!

ስዒድ ኮለነል ተወሊዱ ኣብ ኤርትራ

ኣንታ እንታይ ተረኽበ! ኣብ ኣስመራ

ታንክታት ሰሪዒወን መጺኡ ብሓበራ

ኣብ ፎርቶ ተሰቒለን ኣንቓዕረራ

ይብሃል ነበረ ነስመራ መን! ይደፍራ።

ንጉስ ኤርትራ በለ ክንመውት ብሓበራ

ንኹላትና ይብጽሓና በብታራ

ኣንቀጥቂጦም ናይ ህግደፍ ጭፍራ

ኣይፋልካን ክትብሃል ውዒላ ሓዲራ

ተባህለ ወዲ ዓሊ መጺኡ ዝብዓል ጹሩራ

ናይ ጸላም ብዓቲ ከፈተላ ጩራ።

ኣንታ ወዲ ዓሊ ምስመንከ መኸርካ

ኣይፈለጥካዮምን ኣትማን ኣብ ጎንኻ

ነፋሒቶ መርዛም ኣብ ቅድሜኻ

ብዓል ዕንቅርቢት የማነ ጸጋምኻ

ጠጃኢኡ ከይፈለጥካዶ ተገሪህካ ሰተኻ

ክሕደት ዝናብርኦም ዘይእመኑ ኣሚንካ

ክንደይ እዮም ተቐቢሮም ብቕድሜኻ

ብቕንዕና ተበጊሶም ከምዚ ናትካ።

ጩራ ኣእተኻሉ ነቲ  ጸላም

ራዕዲ ኣትዩዎም በዓል ጠላም

መንእሰይ ኣተስፊኻዮ ተቐንጠጠ ሕማም

ኣይክድቅሱን’ዮም ደቂ ኣስመራ ገልዳም።

ኣንታ ኮለነል ኣሚንካ ጠለምቲ

ኣይፈለጥካዮም ደቂ መታለልቲ

ንሓሶት ከም ማይ ሰተይቲ

ኣብሪሶሞ! ሃገርና እዞም ሓሰውቲ

ህውከተኛታት ሓው ንሓው መዋጋእቲ

ታሪኾም ሓተላ ኣይኮኑን ነበርቲ

ዝዝከር ነይገደፉ ንጽባሕ መጻእቲ።

እንተ ንሽኻሞ! ንፍትሒ ኣማቲ

ኣበሲርካና! ኣብ ፎርቶ ብደበልቲ

ሸፋቱ ኣጥፊእና ንገብረልካ ሓወልቲ

ኣፍሪኻ ኢኻ ንዓኻ ዝኾኑ ተካእቲ

መስዋእትኻ ጅግንነት ዝዝከር ንጥንቲ።

ኤርትራዊ ፍለጦም ጠላማት ሃገርካ

ዓድኻ በሪሱ ጠፍኤ መንነትካ

መንእሰይ ዘይብሉ ዓዲ ኮይኑ በርኻ

ናይ ስዉኣት ሕድሪ ይርሸኑ ደቅኻ

ወለዲ ስዉኣት ተደርበዩ ኣብ በረኻ

መርዑት ይበኽያ ተዋረድ ህዝብኻ

ህጻናት ይበኽዩ ኣቦን ኣብ በርኻ

ዝርከቦ ዘይብሉ ባርነት በዝሓካ

ወዲ ዓሊ እንሆ መንገዲ ከፊቱልካ

ተበገስ ዝተጀመረ ዛዝም ባዕልኻ።

ወየ! ወየ! ወየ!

ኮለነል ኣንታ ወዲ ዓሊ

ኣብ ፎርቶ ተሰቂሉ ደባሊ

ካብ ጸሮና ንእምባ ዘላሊ

ኮኾብ ኢኻ መንበሪኡ ላዕሊ

ጨማቲ! ንኸዳዕ ዘለሊ

ብዓል ግምባር ዘይፈሊ

ድምብርጽከ! ዘይደሊ ከውሊ

ሓኔታ ኣብ ፋረ መጽለሊ

ብድሕሬኻ ክብጻሕ ብዓቕሊ

ተፈሊጦም ብዓል መታለሊ

ኣደ ወዲ ዓሊ በጃኺ ዝለሊ

መርዓት ወዲ ዓሊ በጃኺ ዓልሊ

ስዒድ ጅግናዩ ብዕሊ! ብዕሊ! ብዕሊ!!!!!!!።

መስዋእትነትካ ይነብር ብኽብሪ

ተቐቢልናዮ ኢና እትናትካ ሕድሪ

ተላዒሎ ኣሎ መንእሰይ ንጨኮንቲ ቐባሪ

ኣብ ቃሉ ዝጸንዕ! ዘይብለል ዘይሃስስ ሕብሪ።

ውድቀት ንማፍያ ህግደፍ

ፍትሕን ሰላምን

ንዉጹዕ ህዝብና።