ኤርትራዊ ንሃገሩ እቲ’ምሰሉ ንመንበሩ ተቓሊሱ (ሓሙሻይ ክፋል)

ብደም ዓዃይ ጓሳ ምስ ሸቃላይ ተቐባል ጸበባ

ኣካላ ዝጨቆ ብደም ተሓጺባ፡

ሓንጎል ምሁር መምህር ተምሃራይ ዝወሓጠት ሃገር

ናታ ታሪኽ ክትዝርዝር እዚ’ልካ ዘይንገር፡

ውጽዕቲ ካብ ዓለም

ን 30 ዓመት ዝጠልቀየት ብደም፡

ብናይ ህዝባ ቃልሲ ወዲ ሓንቲ ሔማ

ናጽነታ ሒዛ ወጊዳ ጸገማ

ኤርትራ ክትጽዋዕ ከም ሃገር ብስማ

ኣብ ርእሳ ክትኣስር ናይ ከብካብ ጋማ

ዓለም ክሻባሸብ ኣብ ናታ ከተማ

እዋን ረፈረንደም ብዋዜማ (ድሮ)

ኣብ ታሪኽ ሻዕቢያ መሰል ዲሞክራሲ ዝሓረማ

ብጉልባብ መሃያ ናይ ሰራዊት ኣድማ

ብግሃድ ተራእዩ ንፈለማ፡

ኣብ ኩሉ ከይልሕም ኣድማ ናይ ሰራዊት

መብጽዓ ኢሳይያስ መጻወድያ ክፍኣት

ብታሕታ’ዩ መርዚ ልኡም ቃላት

ኣልሚስዎ ነቲ ውሁብ ኩነት፡

ናይ ተንኮላት መምህር

ነቲ ምንቅስቓስ ቀልጢፉ ኣእቲዎ ኣብ ናቱ ቁጽጽር

ንገለ ከባርር ንገለ ከሕቅቕ ንገለ ክኣስር

ፋሕ ፋሕ ኣቢልዎ ንሰራዊት ግንባር

ብኽፉት ልቦና ሓድሕድ ከም ዘይሓብር

ሓደ ነቲ ሓደ ክጠራጠር

ብእኩብ መኺሩ ሓንቲ ከም ዘይገብር፡

መርበብ ስለዩኡ ዘርጊሑ ኣብ ውሽጡ

ሓሰውቲ ኣብዚሑ ምስጢራት ዝፈልጡ

ዝኾነ ሰራዊት ኮፍ ኢሉ’ራጢጡ

ከይዝቲ ከይነቅፍ መሰሉ ፈሊጡ

ኣርዒዱ ሒዝዎ መሊኹ ጨቢጡ።

ምእንቲ መሰሉን መሰል ህዝቡን ዝሓለወ

ከም ሕሉፍ ታሪኹ መስዋእቲ ንምኽፋል ነፍሱ ዘይፈተወ

ህዝባዊ ሰራዊት ክሳብ ዘይሃለወ፡

ኣብ ኤርትራ ቀጻሊ’ዩ ስደት ስቓይ ማእሰርቲ ሞት

ዕዮ ናይ ጊላነት ሕማም ዕርቃን ጥምየት።

ብድሕሪ 20 ዓመት ናይ ሰራዊት ናዕቢ

ኣብዚ ወርሒ ጥሪ ዕለት 21 2013 ዓ.ም. ዝተራእየ ወዝቢ፡

ሽቶኡ ከይወቕዐ ዋላ’ተበርዓነ

ሓባር ዉድቀቱ’ዩ ንናይ ኢሳይያሰ ቀጻሊ ጭቋነ።