መልቀስ! ንፕሮፈሶር የማነ ገብረ እግዚኣብሄር፡ ወየ! ወየ! ወየ!!!!!!!

ፕሮፈሶር ቁሩብ ዶ ተሃዊኽካ

ከይ ኣስተማቐርናዮ እቲ ልውሃትካ

ከይ ኣኳማስዕናዮ ልቦናኻ ኮነ እቲ ፍቕርካ

ኣሎና ግዜ እንበልናዶ ምሉቕ በልካ።

ኣታ ወድ ወራዙት! ወዲ እዞም ሓገግቲ

ወዲ ሰፊሕ መርየት ወድ ሰብ ርስቲ

ወዲ ኣድከመ ምልጋእ ወድ ጉልቲ

ኣብኩሉ ትጋላበጥ ከም ለምለም ሰቲ

ወሎዶኻ ሰፊሕ ኣብኩሉ መጋጥምቲ

ኣብ ዝደለኻዮ ትዋሰብ ዘይብልካ ዓጋቲ

ወድ እዞም ለባማት ወድ እዞም ኣመቲ

ወዲ ቤት ገብሪኤል ኣርሒቑ ጠማቲ

ዓዲ ሕጊ ዓድካ! ንሕጊ ተርጎምቲ።

ኣቦኻ! ገረዝጊሄር እዞም ብላታ

ኣብ ግዜኣም ዘይነበሮም መሰታ

ካብቶም ሓሙሽተ! ነበሮም ጸብለልታ

ነገር ምስ ተረረ ኣጽንዕ ቃታ

ቃሎም ዘይዕጸፍ ከም ማሕጸ ኣብልዓታ

ንዋይ ዘየሰንፎም ተሪር ብዓል ዋልታ

ምእንቲ መሰል ዝእሰሩ ብዓል ዛንታ

ሓቀኛ ወዲ መርየት ወዲ ባይታ።

ኣንታ ሓወይ ኣንታ መምህር

ንፍልጠት ከም ምዓር ትብርብር

ቀስ ጌርካ ተህድኦ ንዘዕገርግር

ብጽሙዋ ትሰምዕ ንዝግዕር

ህድእ ኢልካ ትምህር ኣእምሮ ክሰቁር

ብዓል ቤት ገብሪኤል ብዓል ዓድሃብር

እሩም ኔርካ ዘይትብል ግትር።

ሓወዶ! ክብለካ መላዝብተይ

ዓርከይዶ! ይሕሸካ መጓይተይ

ወዲ ዓደይ እባ! መርየት መማቕልተይ

ወዲ ሓወቦ ኢኻ መማጉተይ

ገዲፍካኒ ከድካ ኣብ ስደትይ።

ኣሎዶ! ንስኻ ዘይገበርካዩ

ኣብ ቃልሲ ሃገር ኩሉ ኣልኻዮ

ዝተማህረ ክገብሮ ዘለዎ ጽሒፍካዮ

ቅንዕና ንኽዛርብ ንመሓዛኻ ኮርኮርካዮ

ምእንቲ ሓቂን ፍትሕን ዳሕዲኻዮ

ዝገድፍካ የብልካን ኩሉ በጺሕካዮ

ዝተርፈ የልቦ ዓለምውን ዘርካዮ

ኣቦኻ ዘርኣ ዩኻ! ኣብ ስደት ደጊምካዮ

ስለ መንእሰይ! ሲናይ ኣብ ንዩዮርክ ውዒልካዮ

ልቢ ዘለዎ ወዲ ሃገር ሓቲቱ ይስማዓዮ።

መምህር ሓወይ ኣንታ ጥዑም ቃሉ

ክዛረብ ከሎ ኣብ ጎንኻ ህድ ኢሉ

ክንደይ ከይጥዕም ንስኻ ዘይብሉ

በልኪድ እምበር ሰዓትካ ኣኺሉ

መምህር ሓወይ ወገግ እናበል ተላዒሉ

መጋርጃ እናተቐንጠጠ ሰማይ ተስቒሉ

መርየት ክወግሕ እዩ! ንስኻ ዝደኸምኻሉ

ክርስቶስ ይቀበልካ ኣብ ትሕቲ መስቀሉ

ስድራቤት ኣይትሕዘኑ! ኣብ ገነት’ዩ ምዓሉ

ኩላህና ንስናበቶ ንሰማይ ቁሊሕ በሉ

ፕሮፈሶር ሓወይ መሰታ ነይብሉ።

ጽንዓት ይሃብ ንወዘሮ ትብለጽ ጽንዕቲ

ደኸመኒ ከይበለት ኣብ ጸገም ብጸይቲ

ንኹሎም ንስድራቤት ብላታ በብሓንቲ

ኣሜን ኢልካ ምቕባልዩ ዝጸንሔ ካብ ጥንቲ።

ካብ ሓውኩም

ሃይለ ገብረትንሳኤ

ኢንድያናፖሊስ ኢንድያና

11 ለካቲ 2013