ኤርትራዊ ንሃገሩ እቲ’ምሰሉ ንመንበሩ ተቓሊሱ (ካልኣይ ክፋል)

ህዝቢ-ኤርትራ ንቓልሲ ደቁ ንቓልሲ’ሕዋቱ

ኣብ ውሽጢ ይኹን ኣብ ግዳም በብክእለቱ

ተበጅዩልዩ ገንዘቡ ሂቡ’ተላይ ህይወቱ፡

ምስ ናቶም ሰውራ ዝተወደቡ

ንጸላኢኦም ምስጢር ከይሃቡ፡

ሰራዊት ደርጊ ባሕሪ-በረኻ እንከይ ወፈረ

ዘመተ ናቱ እንከይተነግረ፡

ንናቱ ውጥን ኔሮም ዘፍሸሉ

ናብ ደጀን ሰውራ ሓያል መልእኽቲ ዘቀባብሉ፡

ዝተቐጥቀጡ ዝተረሸኑ ወይ ዝተኣስሩ

ዘደንቕ ቅያ’ቶም ዝገበሩ

ብናቶም ሞያ ዘይተዘከሩ፡

መንከ ዘይሰርሐ ንኤርትራና ባሕሪ ሕዛባ

ዓዲ ሕውነት ዓዲ መርሓባ

እንኳንዶ ሰባስ ኣድጋ ገጪባ፡

ብጻዕሪ ህዝባን መስዋእቲ ደቃን፡ ኤርትራ ናጻ ወጺኣ

ብኽቱር ሓጎስ ውኒኣ’ጥፊኣ

ኣብ ጎደናታት ህዝባ ሳዕሲዓ፡

እንተኾነ ግን ህዝባ ኣይከምቲ ባህጉን ከምቲ ትጽቢቱን

ኣይ ከም ድልየቱን ከምቲ ትምኒቱን፡

ብምስሉይ ቃሉ ቅኑዕ ዝመስል

ማዕከን ናይ ተንኮል

ህውከት ሸቐልቀል

ስእነት ሰንፈላል

ጥልመት ምትላል

ቅንኢ ስስዕቲ ዝኸፍአ ኣመል

ስኽራን ዓወልወል

ሒዙ መጺ’ዎ ዲክታተር ሳሕል፡

ብዙሕ ከይጸንሐ ነዊሕ ከይከደ

እከይ ተግባሩ’ቲ ዝገደደ

ኣብ ምሕደራኡ ዛጊት ተጋህደ፡

ዕሸላት ቆልዑት እንታይ ክበልዑ

ኢሉ ከይሓስብ ፍትሒ ረሲዑ፡

ናይ ነዊሕ ዓመት ናይ ስራሕ ልምዲ

ዘለዎ ዜጋ ንወዲ ዓዲ

ስራሕ ዘይከልኦ መንግስቲ ባዕዲ፡

ዲክታተር ሳሕል ከም ኦም ጸልጸሎ

ስራሕ የብልካን ኪድ ጥፋእ በሎ፡

እቲ ብመደብ ገንዘብ ዘዋህልል

ካብ ክራይ ገዛ ነጻ ክወጽእ ነዊሕ ዝጋደል

ህርኩት ህዝብና ጽቡቕ ዝባህጉ

ነቲ ሸንዳሕዳሕ ኩሉ ሓዲጉ፡

ጡጥን መርፍእን እናላገበ

ገንዘብ ብዓቕሙ ምስ ኣኻኸበ፡

ኣብ ባንክ ከይዱ ለቓሕ ሓቲቱ

ኣብ’ታ መሬቱ ሰሪሑ ቤቱ፡

ኣብ ወርሒ መጸ ወለድ ዝያዳ

ነቲ ዝኽፈል ናይ ባንኪ ዕዳ፡

ፍርቂ ሚልዮን ዕዳ ክኸፍል

‘ተዘይከፈለ ክስንዶ’ብጎልጎል

ኢሉ ኣዚዙ ጎይታ ናይ ሳሕል፡

ብዙሕ ጠሪዖም ፍትሒ ስኢኖም

ዲክታተር ሳሕል እዝኑ ዓጺሎም

ግድን ኮይንዎም ግጉይ መቕጻዕቲ ዕዳ ኸፊሎም።