ኤርትራዊ ንሃገሩ እቲ’ምሰሉ ንመንበሩ ተቓሊሱ (ቀዳማይ ክፋል)

ዕግርግር ኮይኑ ሰላም ክጠፍእ

ፋጻ ጠያይት ተዅሲ መዳፍዕ

ባህጊ ዘለዎ ወትሩ ክሰምዕ

ዓዲ ጠንጢኑ ህዝቢ ክወጽእ

ሕጻ ተደብዩ ኣብ ምድረበዳ ሞይቱ ክርሳዕ

ኣብ ባሕሪ ኣትዩ ዓሳ ክብላዕ

ጅግና መንእሰይ ዋርሳይ ዝጽዋዕ

ሃውን ተኵሱ ታንኪ ዘባርዕ

ኣብ ማእከል ሲናይ ከብዱ ክትርባዕ፡

ኣብ ሰብ ዘይርእዮ ስዉር ዕዳጋ

ንኹላሊት ዋጋ ዕዳጋ ክግበረሉ ከም ሓደ ጸጋ

ዓለም ክትስክሕ በቲ ሓደጋ፡፡

ዕጅብ ዘይብሎ ፈርዖን መራሒ

እንትርፎ እከይ ዘይፈልጥ ፍትሒ

ቅንጣብ ዘይብሉ ናይ ኣምላኽ ፍርሒ፡

ብስም ወራራት ንዕስራ ዓመት

በጽሒ ኤርትራ ኣቦ ህጻናት

ተበይንዎ ክሕሉ ዶባት

እስከ ዘይብሉ እዋን ወይ ህሞት፡

ኣብ ህንጸት ሃገር እንበለ ደሞዝ

ኣገልግሉ’ሉ ክኣ ይእዝዝ

ጨካን መራሒ ድኻ ዘይሕግዝ፡

ተባዕ መንእሰይ ምድሪ ዘቢጡ ሞራሉ’ውዲቑ

ብናይ ወለዱ ስእነት ሓሪቑ

ገለ ብነፍሱ ገለ ብደቁ፡

ኣደ’ቲ ስዉእ ኣደ’ቲ ህልው ኣብ ቤት ንበይና

ቀለብሲ ይትረፍ ቡን’ውን ስኢና

ጉልባብ ቀሊዓ ለማኒት ኮይና፡

ኣቦ መንእሰይ ጉህዩ ሓሪሩ

ደቁ ኣጥፊኡ ግርሁ ቃዲሩ

እኽሊ ሃጺጹ ጾሙ ሓዲሩ

ሰማይ ዓሪጉ ናብራ ኸቢሩ

ምጽወታ ደልዩ ነዛ ድራሩ፡

ብመብጽዓታት ሰባት ዝጥብር

ደረቕ መልሓሱ ሓሶት ዘዘውትር

ብእብነ-በረድ ንዱቕ መቓብር

በለቕ ትርኢቱ ጋሻ ዘሀርር

ውሽጣዊ ጋህሲ ሬሳ ዝጸውር

ስርዓት ዘይብሉ ሓድሽ ዲክታተር

ተደለ’ቐትል ተደለ’ኣስር

ተደለ’ደስክል ተደለ’ባርር

ሕጊ ዘይገትኦ እንታይ ዘይገብር፡

ደቆም መንዚዑ ካብ ማእኸል ቤቶም

ኣብ ጥራሕ ገዛ ሓዘን ከይኣኽሎም

ጠፊኦም ኢሉ ዕዳ የኽፍሎም

ሓሙሳ ሽሕ’ውን እንተ ዘይብሎም

ኣረገውቲ’ሉ እንከይ ንሓፎም

ብዘይ ርህራሀ ድማ ይኣስሮም።

ሃረርታ ፍትሕን ሓቅን ዲሞክራስን ዘለዎ ኤርትራዊ