ረሲዖሞዶ ስላሰ!

ኣይሓረሰ ኣይጓሰ

በበሊዑ እናደቀሰ፡

እዋን ወገግ ክብል ንቐዳሞት ዘጣቖሰ

ቀዳመይቲ ቃል ኪዳን ኣደናጊሩ ዘፍረሰ፡

ዓለም ምስተፈጥረት

ኣብ ማእከል ገነት እቶን ዝደርጎሰ

ሃገር ከምዘብረሰ

ረሲዖሞዶ ስላሰ።

እንታይ ከምዝነበረ ናቱ ዕላማ

ንኸምስል ምስ በዓል ሚኪኤል እናዘመረ ዜማ

ዓጢኑ ወዲሱ ከምዘይቀደሰ ፈለማ፡

ኣብ’ታ ለምለም ገነት

ደብተር ሕጊ ረጊጹ ምስከሓደ እምነት፡

ድያብሎስ ብኢዱ

ከምዘብረሰ ዘውዱ

ኣይሰምዑን ድዮም ስላሰ፡ ሕድሪ ሂቦም ምስከዱ።

እቲ ዓሚ-ዓሚ

ዘመን እኒ እኒ ሕምባሻ’ኸሎ እምኒ፡

ባህጉ ከይቀለሰ፡ ዘዕግቦ ከይኮለሰ

ነገር ምሰ’ካወሰ

መጻኢ ዕድል ደቂ ኣዳም ከምዘራኸሰ

ረሲዖሞዶ ስላሰ።

ምናልባት፡

ክልተ ሽሕ ዓመት በዚሑ ዝሓለፈ እንተዘይነዊሑ

መስቀሉ ዘኪሩ ወለ’ዝጊ እንተዘይሰኪሑ፡

ካብ ሽዑ ኣትሒዙ

ክሳብ ሕጂ ዘይቀሰነ’ሎ መሊኡ

ናትና’ኳ ንበይኑ’ዩ።

ይኽደነና ደኣ’ምበር

ዳግማይ ምጽኣት’ዩ ዝመስል መፍትሒኡ

ንገለገሊኡ።

ምኽንያቱ፡

ኩላሊት ተዘልዚሉ ከም ቋንጣ ተሰቒሉ

ልቢ ደሪቑ ብድዐ ሰፊኑ

ሕልና ተደፊኑ

ኣብ ዕዳጋ ካብ ወዓለ ብፕላስቲክ ተጠቕሊሉ፡

ባህልን ወግዕን ድዩ በሪሱ

ሽፍትነት’ዩ ነጊሱ።

ብጎዲብ መላጸ

ዓድን ዓውድን እናተሃወጸ

በትሪ መንግስቲ እንተዘይተንቀሳቐሰ

ወለ’ዝጊ ዳግም እንተዘይተበገሰ፡

ጎርዞ-ጎምበለ እናልቀሰ

ማይ ኣይሂዶ ዘይፈሰሰ

መሬት እናመሰ

ኣለኹምዶ ስላሰ።

መን ይፈልጥ ግን፡

ገሃነም ዝሒሉ ድያብሎስ ቆሪሩ

መሓድሮ ስኢኑ፡ ካብ ሰፈሩ ተፈናቒሉ፡

ካብ ሽፍትነት ናይ በረኻ

ናብ ሽፍትነት ናይ ሽባኻ፡

ተሳጊሩ ዓዲ ኣትዩ ከይህሉ

ስላሰ በጃኹም ደሃይ’ባ ግበሩሉ።

ናይ ምድርስ ተፈቲኑ፡ ካብ ሰማይ’ዩ ዝመስል ጸበሉ።

Daniel Tesfayohannes Teclegiorgis (10/17/12)

This email address is being protected from spambots. You need JavaScript enabled to view it.