ሂወት ሙጉያ

ወየን ኣብራኽ ናይ ደደቢት

ዝረሃጻ ሳሕል ሰንሒት

ተኣሲረን’ምበኣር ኩርንኩሪት

በዛ ዓለም መዳለዊት

ተኹላ እንከሎስ ገንሸል’መውት።

እዛ ውራይ ርኢናያ

ኣቤት ጉያ!

ኣብ’ዛ ዓለም ራህያ

ምስ’ዛ ሂወት ሙግያ

ገድልን ዘውድን ርኢኻያ

ተልእኾኻ ደምዲምካያ

መለስ መለስ ኣቢልካያ።

ኣካ ፈለጥካያ

ኣንጊህካ ስለዝተተሓሓዝካያ

ኣብ ድላይካ ኣብጺሕካያ።

በል ሕጂ

ተመሊስካ እንተትርእያ

ፍቑራት ኣደታት

እንቅዓ’ንቅዓ ክበኽያ

ሚዛን ሞያኻ ምፈለጥካያ።

ቆሪጽካ

ካብ ወሰንካ ግን ሕለፍሞ

ክጸንሓካ’ዩ ዓቢ ህድሞ።

ናይ’ታ ግርማዊት

ኣኽሱማዊት

ማርያም ጽዮን ኖላዊት

ተኸቢቡ ብድባብ ብዳዊት

ስጋ’ምበር ነብሲ ስለዘይመውት

ክትሕወሲ’ኻ ምስ ነጋውስ

ኣብ’ቲ ዙፋን እንዳ ስሉስ ቅዱስ።

እንተ ንሕና እንድዕልና

ብድሕሬኻስ የፍርሃና

ምስ’ቶም ትፈልጦም ስለዝገደፍካና።

መሪሩ ሓዘን በርቲዑ ስቓይ

ሓብር’ባ ኣባይ

በየን’ዩ ሰቲኹ ዝ’ኣባይ

እናተገደበ ቀላይ

ካብ ስራሕ መንጢሉስ ናብ ሰማይ

ንምድሪ ድዩ ከርብሕ ንጸሓይ

ብመድሓኒት ዘይፍወስ ስራይ

ነ’ንበሳ ኣቢሉዎ ኣላሽ ሕራይ።

ተዛረቢ ባድመ

ጉዳይኪ ከይተዓ’መ

መለስ መይቱ ከይሓመመ

ናትኪ ነገር ሓግዩ ዝኸረመ።

መሬት ድዩ ህዝቢ ዝተረግመ

ንእስነት’ዩ ስብእነት ዝጠለመ

እዝኒ ድዩ ሕልና ዝጸመመ፡

ኣብ ዓድዋ

ሓመ’ድበ እናተፈጸመ

ዓዲ ዝወዓልኩ ተኾዲመ

መረብ ዘየስግር ድየ ሓሚመ።

ኮይኑ ግን

ኣብ ፍትሓትካ ክሰግድ’የ ጸዊመ

ወለ’ዝጊ ክሳብ ዝቕበለካ

ክምህለል’የ ቀዊመ

ተልእኾኻ ካብ ተዛዘመ

ይፍጠረልካ ዝጠዓመ

ኣብ’ቲ ደገሰላም ዘይብሉ ባድመ።

08/21/2012

ዳንኤል ተፋዮውሃንስ ተኽለጊዮርጊስ

(This email address is being protected from spambots. You need JavaScript enabled to view it.)