ንሱ

“ ንሱ ”

ንሱ ! ንሱ !

መን’ዩ ንሱ ?

ንሱ ኢልካ ዘረባ

ዘይነበረ ዘይተሰምዐ ብባህልና

አቶ ከይንብሎም ፈሪሂና

ኣትን ከይንብል ሓፊርና

ንሱ ክንብል መሪጺና

ዘይኣርግ ዘይሓምም ካብኮነና

እምኒ ዲዩ ሑጻ ጠፊኡና

ምድቃስ ዝፈቱ - ሓኺሊ ዱሙና

- ይጠፍእ ይቕልቀል

- ከም ደቂ ሕድርትና።

ንሱ ከይዱ - በጺሑ ተመሊሱ

ጉርሕን በለጽን - ኣቃማጢዑ ሓዋዊሱ

ሓሚሙ ከይበሃል - ደኺሙ ተረሚሱ

ብደቓይቕ ብሰዓታት - ምስጢር ተለዊሱ

ጋሻ ባርካ ሰንሒት - ንስራሕ ተጋይሹ

ንኣስመራ ባጽዕ - መጽአ ተሓዲሱ

ዘይኣርግ ዘይሓምም - ቀይሕ ባሕሪ ሓንቢሱ

ኣመል ምስ መግነዝ - ዲኖ ለቢሱ

ዓገብ ዝብል ጠፊኡ - ነገር ተሓዋዊሱ።

ንሱ ! ደንጎላ’ዶ ?

ይሓምም ብርእሱ ?

ሰዓብቱ ግን ተሻቒሎም -

- መሲሊዎም ተሓቢሱ

ኣመንቲ ጣኦት -

- ምስለ ሰብ ዝለበሱ

በሉ ንሱስ በጺሑ -

- መጺኡ ተሓጎሱ

ዓድኹም ህዝብኹም ግን -

- ብሓዘን ተረሚሱ።

ምስ መን ተራኺቡ?

- ኣበይከ በጺሑ

ኢልኩም ኣይትሕተቱ -

- ኣይነበርኩን ኣብኡ

ሚንስተር ሓበሬታ አሎ -

- ናይ ሓሶት መዘናኡ

ጎይትኡ ደቂሱ -

- ንሱ ግን ኣተንሲኡ

ብሕልሚ ኣዛዊሩ -

- ኣብ ኩሉ ኣብጺሑ

ሰከንድ ደቓይቕ - ተቖጻጺሩ ጫጭሑ

ሐንቲ ከየጉደለ - መርሚሩ በጺሑ

ጸብጻብ ደንጎላ - ደቂሱ ተንሲኡ

ጥዕና ሓርማዝ - ከም ዘለዎ ኣስሚዑ

መንዶ ተጋግዩ - ብዘካ ባዕሉ

እምኒ ኣይሓምምን ኢሉ -

- ከረድእ ምፍታኑ።

ኣታ ከይዱስ ነይሩ -

- ንወርሒ ተሰዊሩ

ምስ መን ከምተራኽበ -

- ጥራይ’ዩ እቲ ሽግሩ

ሳጥናኤል እንዶኾን?

- ኣሲርዎ ነይሩ እግሩ

ካብ ዓራት ከይወርድ

- ተጸሊሉ ኣዕገርጊሩ

መን’ዩ ብተንኮል?

- ዝኣሰሮ መሓውሩ

ጭቁን ሓፋሽ ከይዕወት -

ዳብሊዮስ ተሳዒሩ።

ሰዓብቲ ሳጥናኤል - ብደም ሰብ ዝሰኸሩ

ዘይሓስቡ ዘየስተውዕሉ - መጥፊቶም ዝቖጽሩ

ሃገር እንዳዓነወ - ብሓሶት ዘዕገርግሩ

ብሕልና ሙውታት - ብዓይኒ ዝዓወሩ

ብርሃጽ ውጹዓት - ብጥቕሚ ዝሰኸሩ

ብሞራል ጥፉሻት - እንታይ ደአ ክገብሩ

ብዘይካ ንኸብዶም - ካልእ ዘይተማህሩ

እንታይ’ሞ ከፍርዩ - እንተበኸዩ እንተጨደሩ

ሓሶት ጥልመት’ዩ - ተራቢሑ ተደሚሩ።

ንሱስ በጺሑ ተመሊሱ

ወየለኹም ዘይናትኩም - ብህርፋን ትሓፍሱ

መሰል ህዝቢ ነፃነት - ብግፍዒ ትግህሱ

ባህልን ክብርን ሃገር - ንወለዶ ተፍርሱ

ንደንጎላ ጊንዲ - ንጣኦት ክተንግሱ።

ህዝቢ ግን ተንሲኡ - ክጸርገኩም ሓዋዊሱ

ንፍትሒ ሕጊ - ማዕርነት ኣልቢሱ

ንኣውራጃ ሃይማኖት - ፍልልይ ኣልጊሱ

እንሆ ብሕብረት - ብስኒት ተበጊሱ

ንጭቆና ግፍዒ - በታቲኑ ከርሱ

ክሳዱ ከቅንዕ - መሰሉ ኣምሊሱ

ንስደት ባርነት - ኣጥፊኡ ተሓጊሱ

ጸልማት ተገፊፉ - ምዕባለ ቅሳነት ለቢሱ

ታሪኽ ክፈርደኩም - ንሰዓብቱን ንሱ።

ሰለሞን ብርሃነ ሠንጋል

“ ሕልና - 05/25/2012 ”