ኤርትራዊ ንሃገሩ እቲ’ምሰሉ ንመንበሩ ተቓሊሱ (ሻምናይ ክፋል)

ኤርትራ ክንሳ ናይ ኩላትና
ናይ ሳሕል ዲክታተር በይኑ ምስ ወነና፡

ኣባጽሓ ኩሎም ረኺቦም መከራ
ንዓመታት ተፈልዮም ካብ ስድራ፡

ኣይትምህርቲ ስራሕ ካብ ወጽዓ ናብ ወጽዓ
ዕድሚኦም ሓሊፉ ከይወለዱ ቆልዓ
ክሕልዉ ንዲክታተር ስርዓት ኮይኖም ደቀርብዓ
ብናቶም ናፍቖት ኣቦ’ደ ነቢዓ
ኣብ ዘመን ኣምሰሉ ፍትሒ የልቦን መንዩ’ሞ ክሰምዓ፡

ከይልቀቑ ታዕሊሞም ወዲኦም
ዶባት ክሕልዉ ተፈሪዶም
መዕለቢ ዘይብሉ ንሙሉእ ዕድሚኦም
ንዋዒ ናይ ጸሓይ ባህርያዊ ጸገም
ንጥምየት ንጽምኢ ንዕርቃን ንድኻም
ብትብዓት ብሓቦ ተጻዊሮም
ንሱ ከይኣኽሎም
ኣብ ብሻ ወዘተ … ተዋፊሮም፡

ብስራሕ ጊላነት ንዘይብሉ ተስፋ
ላዕልን ታሕትን ክብሉ ትንፋሶም ሓሊፋ
ካብ ምሳሕ ካብ ድራር ዘይሓልፋ
ዓስቢ ባርነቶም ይዋሃቦም ናቕፋ፡

እቶም ኩሎም ዋርሳይ ሃገሮም ዘውሓሱ
ድሕሪ ክንደይ እዋን ፍቓድ ተዋሂብዎም እንተገሹ
ኣብ ገዛ ትጸንሖም እታ’ደ ሓሚማ ኣቦ ተረሚሱ
ብምኽኑይ ጸገሞም ደንጉዮም ምስ ተመልሱ
ኮብሊልካ ብዝብል ይውቀሱ
ብሕማቕ ማእሰርቲ ይቕጽዑ ኣብ ከም ትሕቲ መሬት ዋዒ ይጥበሱ
ገሊኦም ይሞቱ ገሊኦም ይለምሱ፡

መዳሕንቶም ዝተቐብራ ሃገር እዛ ዘይትቕበጽ
ስርዓት ኢሳይያስ ብህዝቢ ዘላግጽ
ምስ ኮነቶም ዘይትንበር ዘይትርገጽ ረመጽ
ከይፈተዉ ገዲፎማ ይብሉ ነፊጾም ሃጽ፡

ኣብ ምህዳም’ውን ኣሎ ዓወት ወይ ሞት
ደው በል! ተባሂሎም ክጎዩ ንቕድሚት
ሽዑ ይርሸኑ ብዘይምሕር ጥይት፡

ንናቶም ወለዲ ኣብ ገዛ ዘይብሎም ምሳሕ ድራር
ሓገዝ ሰብ ዝደልዩ ዝብሉ ውዕል ሕድር
መስዋእቶምሲ ይትረፍ ሞቶም’ውን ነይንገር
ከም ኣራዊት ሬስኦም ይስንዶ ኣብ ፈቖዶ መሮር፡

መንእሰይ ኣብ ምብራስ በዚ ዝኽተሎ
ስርዓት ኢሳይያስ ኤርትራዊ እዩ ንኽትብሎ
ኣብ መጻኢ እዋን ጌና ዘይተጋህደ ሰፊሕ ሓተታ’ሎ።

ሃረርታ ፍትሕን ሓቅን ዲሞክራስን ዘለዎ ኤርትራዊ