ዮሃና ንህዝቢ ሊብያ ብስዕረት ቀዛፊ
ዘንጋ! ዘንጋ! ኣርኪብኩም ደርቢኹምዎ ብጸድፊ
ውድቀት ንውልቀ መለኽቲ ናይ ውጹዓት ደርፊ
ብድሕሪ ቀዛፊ መን'ዩ ኮን ተቀዛፊ

ድሕሪ ቀዛፊ መን ተቀዛፊ

ኣብ ሃገርና ዘሎ ዲክታቶር ብሕልፊ
ወትሩ  ምስ  ሰኸረ ብናይ ስልጣን ወልፊ
ባዕሉ ፕረዚደንት ባዕሉ ፓርላማ ባዕሉ ሰልፊ
ኣብ ዘድልዮን ዘይድልዮን ባዕሉ ተወታፊ

ድሕሪ ቀዛፊ መን ተቀዛፊ

ቀዛፊ ተሳዒሩ ድሕሪ ብዙሕ ፈኸራ
ህዝቢ ሊብያ ተገላጊሉ ካብ ሓሳረ-መከራ
ብናህሪ ነፊሱ ንፋስ ናይ ሰውራ
መዕለቢ ደልዩ ኣብ ከተማ ኣስመራ
ይኣክል ትብል ኣላ ኩላ ብሃገራ
ወዲ ኣፎም ርእስኻ ኣጥልል ክትላጸ በጺሑ ናትካ ተራ
ክሳብ መኣስ ከተብሳብስ ንህዝቢ ኤርትራ

ድሕሪ ቀዛፊ መን ተቀዛፊ

ህዝቢ ሊብያ ተገላጊሉ ድሕሪ ከቢድ መስዋእቲ
ካብ ሕማቅ መራሒ ክላቀቅ ምእንቲ
ኩሉ ውረድ ይኣኽለካ በለ ሰብኣይ ምስ ሰበይቲ
ሓደ ኢድ ኮይኑ ኣብ ደገ ኣብ ውሽጢ

ድሕሪ ቀዛፊ መን ተቀዛፊ

ቀዛፊ ህዝቢ ንምጽናት ኣምጺኡ ዕሱባት
ቀቲሉ ኣሲሩ ዘይተኣደኑ ሰባት
ደጊም ይሸባሸብ ኣሎ ካብ ሊብያ ንምስንባት
ዓዲ ክትመሓደር ብምሁራት ብለባማት

ድሕሪ ቀዛፊ መን ተቀዛፊ

ወዲ ኣፎም እነሆ ዓርክኻ ቅሂሙ
ስልጣኑ ኣንቆልቂሉ ደጊም ተዛዚሙ
ብዙሕ ኣዕገርጊሩ ግዒሩ ኣዕዘምዚሙ
መእተዊ ስእኑ ተሸሪቡ ሃዲሙ

ድሕሪ ቀዛፊ መን ተቀዛፊ

ተለዓል ህዝብና ገልፎ ንህግደፍ
ሓደ ኢድ ኩን ናተይ ናትካ ግደፍ
ካልኦት ኣይትጸበ ክቶዅቡልካ ደገፍ
ንውልቀ መላኺ ደርብያ ኣብ ናይ ታሪኽ ጎሓፍ
ከም ቀደምካን ኣመልካን ጽቡቅ ታሪኽ ጸሓፍ

ድሕሪ ቀዛፊ መን ተቀዛፊ

ይኣክል ንበሎ ንሕናው'ን ሓቢርና
ኣብ ሃገርና ክንነብር ቀሲና' ከቢርና
ብሰንኪ ስርዓት ህግደፍ ተዋሪድና ሓሲርና
ሃየ ንገል'ፎ ዝኸሰርና ኸሲርና

ድሕሪ ቀዛፊ መን ተቀዛፊ

ትርቡሊ ዮሃና ትብለኪ ኣስመራ
መባልዕትኺ ይግበሮ ናይ ሰውራኺ ኣዝመራ
ከማኺ የማስለኒ እጽበ ኣሎኹ ናተይ ተራ
ጥዑም ንፋስ ከስተንፍስ ካብ ዘለኹዎ መከራ

ድሕሪ ቀዛፊ መን ተቀዛፊ

ኣንቲ ኤረይ ኩሑሎ
ራህዋኺ ቀሪቡ'ሎ
ወዲ ኣፎም ክዕሎ

ወድ ዓድ