ኣብ ዝሓለፈ መዓልታት ኣብ ትሕቲ መግለጺ መርገጽ ስድሪ ካብ ሃገራዊ ጉባኤ ዝብል ኣርእስቲ ዘስደምም ኣሽምባይዶ ካብ ምሁራት ካብ ተራ ሰባት ዘይትጽበዮ ጽሑፍ ድሕር ምንባብ በዛ ትስዕብ ግጥሚ ክምልሰሎም ወሲነ

ስሰናይ ንባብ
ድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
ብርሃን ካብ ትርእዪ ጠሚትኪ ንምድሪ
እስከ ንገርና ምስ መን ኢኺ ትመኽሪ
 
ስድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
 
ብርሃን ካብ ትርእዪ ኣይሰጎምክን ስድሪ
እምባና እንዳ ፈረሰ ትጥምቲ ንኣድሪ
እምብዛ ንዒቅክዮ ናይ ተቃወምቲ ወፍሪ
ግሁድ ነገር ሓዲግኪ ድጉል ትጽሕትሪ
እኩባት ገዲፍኪ በይንኺ ትምድሪ
ካብ ሰብኪ ርሒቅኪ መኽሰብ ነይትዓትሪ
 
ስድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
 
እንታይ ምስ ኮንኪ ኢኺ እዚ ኩሉ ትዓፍሪ
ህዝቢ እንዳ ሃለቀ ኣብ ምድረ በዳ ኣብ ባሕሪ
ኣብ ማሕቡስ ተዳጕኑ ክቅጥቀጥ ብበትሪ
ብሃሩር ክጥጠቅ ክሳቀ ብቍሪ
ኣብ ክንዲ ትሓዝንሉ በሰል ህግደፍ ክትሰትሪ
ከም ሽፍታን ዘማትን ክትዕንቅፊ ትጽዕሪ
 
ስድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
 
ምሁራት ናይ ስድሪ ዘረባኹም መስደምም
እኩባት ይዘርግ ጥዑያት የሕምም
ኣይትንፍዑ መርገም'ዩ ዝጸንሐ ካብ ቀደም
እንዳ ረኣኻ ሱቅ ኣይትበል ኣይትጽመም
ንዑ ተሓወሱ ኣብ ሰብኩም ፍትሑ ናይ ህዝብኹም ጸገም
 
ስድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
 
ለውጢ ኢልኩም ግርም መታለሊ
ኣስተውዕል ህዝብና ጎዳእትኻ ኣለሊ
ፍለጦ መን'ዩ ጉድኣትካ ዝደሊ
መን'ዩ ጥቅሚ ሃገርን ጥቅሚ ነፍስን መምዩ ዘይፈሊ
 
ስድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
 
ዘረባ ስድሪ መስደምም ምስትንክር
ኣብ ክንዲ ምል'ዛብ ወትሩ ዕግርግር
ካን ረሲዕኩምዎ ዲኹም ናይ ህዝብና ሽግር
ብሽሙ ትሽቅጡ ካብ ማዕዶ ካብ ስግር
 
ስድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
 
ዝኽርን ክብርን ንስውኣትና ጀጋኑ
ምእንቲ ህዝቦምን ሃገሮምን በጃ ዝኾኑ
ሰላምታይ ይብጻሕኩም ለውጢ ቀሪቡ እዋኑ
ኣብ መቃብርኩም ምእንቲ ክትቀስኑ
ስድሪየ ስድሪ እንታይ ኢኺ ክትገብሪ
ጉድክን ምስጢርክን ተቃሊዑ ብቀትሪ
 
ኣንቲ ኤረይ ኩሑሎ
ራህዋኺ ቀሪቡ'ሎ
ወድ ኣፎም ክዕሎ

ብወድ ዓድ ካብ ስደት ዕለት 2 ሰኔ 2011