እዋይ ጉድ - ኩሉ ተዓኒዱ

‘ንዳረኣየ ኸሎ - ሕሰም ኣሕዋቱ

በቃ ትም - ትም መሪጹ

ዓይኒ ዕምት - ኣፍ ሕትም

ሙኻን ናቱ ይሓይሽ - ዝመረጸ ትም

ፈትዩ ኣይመስልን - ኢሉ’ዩ ዕንድ

ምዝራብ ስኢኑ - ኣፉ ሉክት

ኣነ ዝገርመኒ - ናይ’ቲ ዝልፍልፍ

ዓይኒ ሰብ - ምንቋር ዝመርጽ

ንጻዕዳ ጸሊም - በ’ሕዋቱ ዘላግጽ

ናይ ሰብ ቁስሊ - ብዕንጨይቲ ዝትንክፍ

ሕሉፍ ድማ ሎምስ - ተሰሚዑ ዘይፈልጥ

‘ንዳተሳቐየ ሓውኻ - ይብሉኻ በል ዕልል

ዝሰማዕካዮ ኣይትዛረብ - ዝረኣኻዮ ኣይትመስክር

ደናቁር ከይትብሎም - ዘበሉ ዶክተር

እዋይ ክኸፍእ - ምሁር ክድንቁር

ብደዉ ኸሎ - ክብል ዕንድ

ሓቂ ድዩ ተኸዊልዎም - ፍጹም ዘይተራእዮም

ወይስ ብጠጠዎም - ምሕርናኽ ጀሚሮም

ንኣውያት ኣሕዋት - ጸማም እዝኒ ሂቦም

ምምዝዛን ስኢኖም - ጥቕሚ ኣስኪርዎም

ንዘየለ ተስፋ - ከጨብጡ ተዓጢቖም

ሓሶት ‘ንተተኾመረሲ - ሓቂ ዝቕየር መሲልዎም