ሓንቲ ዘይተላቡ ጥይት ንቕባጸት ንሞት
ዓባይ ህያብ’ያ ኣብ ምድረገሃነብ ኣብ ምረት።             

ወጋሕታ ሰዓት 5 እትስእ አሕተት ንኽለፋለፍ
ብዘይ ፍትሒ ኣብ ገረብ እእሰር እደሚ እግረፍ።

መሊሶም እድርብዩኒ ናብታ ሸላ ክነጽፍ ዛራዪ ንብዓተይ
አቲ ሩሕ እንዶ’ሞ ተጸንቒቑ ከይበኪ ከየውጽእ ነድረይ።

ንግሆ ሰዓት 8 ንመሮር ንወፍር ተኾብኪብና
ከመይ ኢልካ’ሞ  ክስጎም ረኺሱ ቖሲሉ ኣእጋርና።
 
እድፋእ እንውነው እምናዕ በቲ ሕሉል ዋርድያ
ቀልጥፍ! ይብል ብዓውታ ይገርፈኒ ብዘይንሕስያ።

አዚ ኹሉ ሓሳረመከራ ዑቑር ሽንቲ ቐልቐል ንምንጋፍ
ጠበንዻ ኣብ ርእሰይ ይቐንዕ፡ይቕጽል ስቓየይ ብጭካነ እግረፍ።
 
ዳግም እምለስ ናብታ ሸላ ንሳ’ውን ረስኒ ትተፍእ ዝያዳ 10 ዲግሪ ትቖጽር
ኽሌማ’ውን ብግዲኡ ኣይናሓፈንን ተሓባበረ ምስቲ ሕሉል ወተሃደር።
             
ማይ! ማይ…. በልኩ በኸኹ ገዓርኩ በቲ ጽሙአ ጎሮረይ
ሻሂ ምስ ቁራስ ሕብስቲ ጥራይ ደኣ ኣምጻኣለይ።
 
ምስለይ ተደዊኑ ብረሃጽ፡ ሰብነተይ ማሲኑ ብቓንዛ ብስቓይ
ቑልቑል ኣፈይ ወደቕኩ፡ ተመነኹ ብርነት ጸላእኩ’ውን ምፍጣረይ።
           
መንፈሰይ ተሰብረ ኽብረይ’ውን ተደፍረኒ
ፍጹም ተወጃቢሩኒ ጭካኒኦም ምርዳእ ኣብዩኒ።
 
እንታዩ ኣበሳይ እንታዩ በደለይ እስኪ ንገሩኒ እንታይ?
ስለዝጻሓፍኩ ድዩ ወይስ እቲ ፈጣሪ ዝሃበኒ ቓለይ።
        
እንታይ እዩ'ሞ እንተጻሓፍኩ እንተጸወኹ ናይ ልበይ ቐልበይ
ኣይበዝሐን'ዶ ዓይነይ ዒረ ክንሰይ ጸልሚቱ ሂወተይ።
አዚ ኺኖቲ ኣካላዊ መግረፍተስቓይ ዝያዳ ዝኸደ
ኩሉ’ቲ ዝሓለፈ ቓልሲ ካብ 1974 ክጽብጽቦ በብሓደ
ዘሕዝን ክትርድኦ፡ ዘጸግም መደምደምታ ኣልቦ ዝገደደ።

ከይዛረብ ኣፈይ ተሎኪቱ ተነፊገ ሰብኣዊ መሰለይ
ማዕከናት ዜና የለዋን ብኣይ ከይሓታ ከየቓላሓለይ
            
ሓርቢቱኒ ተስፋ ርሒቑኒ፡ ተረበጽኩ ተናወጸ ኣእምሮይ
ፍትሕን ርትዕን አለዋን ከይዳንያ ከይጣበቓለይ
            
ከካርጃዶ ዕምረይ፡ ክሓጽር ዕድመይ ከኸትም ሂወተይ
ኣበደን! ኩሉ ክጾሮ’የ ስለታ ፈቓር ለዋህ ስድራ ቤተይ።

ዛጊት ሰዓት 8 ናይ ምሸት ኮይኑ እቲ ቐዝሒ’ውን ኣብ ኣዕጽምተይ
ኣብ ምድሪ ኣብ ኹርኻሕ አድቕስ እምኒ መተርኣሰይ።

ንትሽዓተ ዓመት መመላአታ መግረፍተስቓይ
ትሽዓተ ዓመት ኣለሽ ኢለ ቐሊዐ ጉልባበይ

ናይ ቐስታ መግረፍተስቓይ ክቐዝፍ ነዛ ክብርቲ ሂወተይ
ኣበደን ኣይምብርከክን ጽንዓት’ዩ ሓይለይ ዱልዱል’ዩ አምነተይ ።

ሓንቲ ዘይተላቡ ጥይት ንቕባጸት ንሞት
ዓባይ ህያብ’ያ ኣብ ምድረ ገሃነብ ኣብ ምረት።