ነጻነት ደማቕ’ያ - ኣይተህስስዋ በጃኹም
ሸሪፍኩም ጨሪምኩም - ንዓኹም ብዝጥዕመኩም

ነጻነት ናይ መሬት - ይሳነይ ምስ መሰል
ኩሉ ወዲ ሃገር - ብማዕረ ክሑገስ
ሕጊ ይሃልወና - ንኹሉ ዝጥርንፍ
ከይከውን ንጠንቐቕ - ሚዛኑ ዘይህዱእ

ንስራሕ ብሓባር - ንረብሓ ሃገርና
ሕጊ’ውን ይስፈን - ዝመስል ንዓና
ብሰብ ዘይኮነስ - ንመራሕ ብሕጊ
ልዑላውነት ሕጊ’ዩ - ሓድነት ዘፍሪ

ሃገርና ነቐድም - ካብ ጥቕሚ ንላዕሊ
ይኣክል ፍልለ - ንቀየድ ብሕጊ
መሰረት ነንጽፍ - ከይንኸውን ተሓተቲ
ንዝመጽእ ወለዶ - ባይታ መሳፍሒ

እምበር ንሕና ድኣ - ጽባሕ ንግሆ ሓለፍቲ
ስራሕ’ዩ ዝተርፍ - ነባሪ ሓወልቲ
መራሕትን ህዝብን - ከይኮኑ ማይን ጸባን
ብሓደ ኢድ ጣቕዒት - ፍጹም ዘይደምቕ

ሓረስታይ ብዘይ ማይ - ከመይ ኢሉ ከልምዕ
ሃገር ብዘይ ዜጋ - ከመይ ኢላ ክትልዕል
ኤርትራ ብዘይ ቅዋም - ጎደሎ ከይትኸውን
ይኹን ናጽነትና - ሙሉእ ዘቕስን