ኣካለይ ነዲዱ ናብ ቃሬት ክቕየር
            መትነይ ተነቒሱ ብቃንዛ ክጭድር
            ይብዳህ ግን ግዜ ብጽንዓት ይንበር
            እንተ ንሳቶም ግን ይኣልሙ መዋጥር

ይማስን ሰውነተይ ይስልኪ የንቀይቅይ
ግዜ ነዊሑኒ እወ ተዳኺሙ ሓይለይ
እዚ'ኳ ኣነ ኮይነ ይሓልፎ ብዓቕመይ
እንተ ንሳቶም ግን ይመጽዩ ንደመይ

            ኣእጋረይ ደኺመን ጾር ከቢዱወን
            እናሻዕ ዝራባሕ ሽግር ተሰኪመን
            ይስገር ኣሎ ግዜ ከም ምሕላፉ ዘመን
            እንተ ንሳቶም ግን ኣብ ዝባነይ ሸነን

ዝደጋገም ዕጫ ይወርደኒ ዝመረረ
ከይወግሐ ይመሲ ይጽልምተኒ እናሓደረ
ስለ ሓቦ እምበር እዚ'ዶ ምተጾረ
እንተ ንዐኦም ግን ጸልማት'ዩ ዝሕረ

            ሕጂ ግን ይኣክል ሽግረይ ኣብዚ የብቅዕ
            መዓንጣ ሸጥ ይበል ፈታውየይ ይጽናዕ
             ኣዒንቲ ቋሕ ይበላ መብራህቲ ይኮላዕ
             እንተ ንዐኦም ግን ይውረዶም ኣደራዕ

ክልተ ኣእዳዎም ብደም ዝተሓጽቡ
ኣመንቲ ድንቁርና ናይ ጽባሕ ዘይሓስቡ
ዝሙታት ሕልና ኣሕሊፎም ዝህቡ
ዝሃቦም ጭካነ ከምኦም መን ረኺቡ

            ጠንቂ ስቓየይ መከራይ ኢዮም ይለለዩ
            ሰቦም ዝበተኑ ኣዒንቲ ዘድመዩ
            ስጉምቲ ይወሰድ እዚ'ኳ ደንጒዩ
            ዝሙታት ሕልና ሎሚ ይጸሃዩ።