ልክዕ ድሕሪ ሰላሳ ዓመት እቲ “ጽላለ’ዶ ዝርወት” ተባሂሉ ዝተዘንተወ ተረሲዑስ፣ እቲ ዝገርም ፕረሲደንት ኢሳያስ ጽላለን ዝርወትን ከም ንቡር ንሕዝቢ ኤርትራ ክቅበሎ ምህቃን ጥራይ ዘይኮነስ ኣብ ሃለውስን ሃንደርን ምጥሓሉ ኢዩ። ገለ ካብቲ “ጽላለ’ዶ ዝርወት” ዝብሎ ኣብ ኣስመራ ዝርኣኽዎ በብግዜኡ ከዘንትወልኩም’የ። ንሎሚ ግን እስከ ብኣላክሳንደር ፑሽኪን ንጅምር።

ናይ መጀመርያ መንግስቲ ኤርትራ ዝተኸሎ ሓወልቲ ናይ ኣለክሳንደር ፑሽኪን ምዃኑ ትፈልጡ’ዶ?

ዝገርም’ዩ። እዝስ “ጽላለ’ዶ ዝርወት?” ያኢ ኤርትራ ናይ ጀጋኑ ዝኽትምና ከምዘለዋ፣ ካብ ራሻ ክትልቃሕ? ጋዶ እኳ እዩ። ፑሽኪን ድኣ መዓስ ዝዝክሮ ሲኢኑ። ጀግና ስውእ ሓሰበላኸ እንታይ ኮይኑካ? ጀግና ስውእ በርሀ ጻዕዳኸ ረሲዕካዮ ዲኻ? ብዓቢኡ ዓዋተ’ኸ ምዝካር ዲኻ ሲኢንካዮ? ሓርበኛታት ሃገራውያን ኣቶ ዓብደል ቃድር ከቢረን ራእሲ ተሰማን ኣቶ ወልደኣብ ወልደማርያም ቃልሲ ናጽነት ንኤርትራ ኣይጀመርዎን ዲኻ ትብል ዘለኻ? እንተ እቲ ማሕቡስካ ዘሎ ኣቡ ዓረኸ? ዘይጀግና’ዶ መሲሉካ?

እቲ ዘስደምም ግን ሚኒስትሪ ዜና ምስ ቤት ጽሕፈት ህ.ግ.ደ.ፍ. ተሓባቢረን ሓደ ሓይሊ ዕማም ምቛመን እዩ። እቲ ዕማም ድማ ኢሳያስ ኣፈወርቂን ኣለክሳንደር ፑሽኪን ዘሎ ምምስሳል ዳህሳስ ክገብራ ኢዩ። ሓደ ካብቲ ዘገርም ዝበልዎ ድማ ድሕሪ ኣለክሳንደር ፑሽኪን ድሕሪ 200 ዓመት ዝተወልደ ጂኒየስ ኤርትራዊ ብሓቂ እንተረእናዮ ኢስያስ ኣፈወርቂ ኢዩ እናተባህለ ክዝንቶ ዊዒሉ። ኣብቲ ምምራቕ ሓወልቲ ናይዚ ምህዞ ባዕሎም “ጂኒየስ” ዝኾኑ ከም በዓል የማነ ገብረኣብን ዓሊ ዓብዱ ዩኑስን ተረኺቦም።