ሕጊ ንኸስፍን ከመሓድር ብማዕረ
ይመጽኣ’ሎ ተጋዳላይ በዓል ስረ
ክሃንጽ ሃገር ከይወዓለ ከይሓደረ
ክበሃል ከሎ ግንቦት ምስወዓለ።

ውዒልካዶ ኣብኡ ኔርካዶ ሽዑ!
ቀሪቡ’ሎ ይመጽኣ’ሎ ሃብሮም ጥሒሻ ይሓንና’ሎ
እንታይ ሒዝና ኢና ንቕበሎ እንታይኮን’ዩ ባህ ዝብሎ
አረ!  እንታይኮን’ዩ ዝኣኽሎ ክበሃል’ከሎ።

ውዕልካዶ ኣብኡ ኔርካዶ ሽዑ!
ድምጺ-ሓፋሽ ዝፈነወቶ ወረ
ከም ቃል መጽሓፍ እናተደግመ
ኣቤት’ወ ክበሃል ከይተጻረ
ውሽጠ-ውሽጢ ክሰርጽ ከይተመመ።

ውዒልካዶ ኣብኡ ኔርካዶ ሽዑ!
ደበኽ ምስበለት ወርሒ ግንቦት
ሕልምን ባህግን ምሰ’ግሃደት፣
ወያ ነጻነት መጺኣስ ፈቐዶ ክሳድ ክዕምር ጓይላ
መወዳድርቲ ከምዘይብላ ርእሺ ኹሉ ተሳፊራ
ክትውደስ ክትከብር ከም ታቦት ተሰቒላ
ኣስላምይ ክስታናይ ክሰግዱላ
ሰብኣይ-ሰበይቲ ክድብሉላ።

ኔርካዶ ሽዑ ውዒልካዶ ኣብኡ!
ወጺኦም ኢትዮጵያ ኣትዮም ሻዕብያ
ተባሂሉ ዝደመቐ ጓይላ ዝተራእየ ጉያ ዝነበረ ዝላ
ኣብ ታሪኽ ሰፊሩ’ሎ ነ’ድንቖት ንቕያ።

ናይ ልቡ ምስረኸበ ዝተመነያ
ሕጻን ሽማግለ ብዘይ ዋርድያ
ኣብ ቅርዓት ክትሓድር ክትፍሳህ ተዛንያ።

ነጻነት ስማ ብኢድ ዘይትድህሰስ ብዓይኒ ዘይንርእያ
ከም ጸሓይ በሪቓ ከም ሩባ ዛርያ
ብድምጺ ብዙሓት ክትማሙቕ መጋርያ።

ውዒልካዶ ኣብኡ ኔርካዶ ሽዑ!    
        
እታ ዝበረቐት ለውጢ ተኣምር ተባሂላ
ኩሉ ክቕበላ እዝጊ’ውን ክሓርያ
ኣእዳዉ ዘርጊሑ ባሪኹ ከፋንያ።
እወ ኣሰር ነጻነት ዝሰዓበ ኽረምቲ ዝተፈነወ ራህያ
ዝበቖለ እኽሊ ዝሳዕረረ ሙግያ
ማና ከምዝፈሰሰት ማዓጹ ሰማያት ኣርሕያ
ብምልኣት ክትዕንግል ንዝተጸበያ
ኢድ ኣባዥጎ ብጋህዲ ተራእያ
ራህዋን ሰላምን ኣመኣዛዝያ
ንሕጻን ነጻነት ከተታትያ። (ይቕጽል!!)