እታ ዝፈትዋ፤ ዝፈልጣ ኣብ ስደት
ኣብ ሽግር ኣብ ጸልማት፤ ምሳይ ዝነበረት
ኣብ ሜዲተራንያን፤ ኣብ መዓሙቕ ቀላይ
ብወዝቢ ሃንደበት፤ ዓሳ ወሲዱለይ

መሬት መስ መስየ፤ ንባሕሪ ኣቲና
ኣብታ ጀልባ ኾይንና፤ ጸሎትና ኣዕሪግና
ንማእከላይ ባሓሪ፤ ብህድኣት ክንስግሮ
ፍቕሪ እናዕለልና፤ ብስላም ክንከዶ
ድሌትና ክንረኽባ!

ትስፍዋት ኢና ኔርና፤ ክንኣቱ ኤውሮጳ
ሰብ ይሓስብ፤ ጎይታ ይፍጽም
ኣብ ከምኡ እዩ ዝጥቕለል እዋይ ነገር ዓለም።

ኣንፈት ምስ እጥፋእና፤ 3ይቲ መዓልቲ
ማዕበል ዓሳ ሒዙ፤ መጺኡና ብለይቲ
ፍቕረይ ነነው ክትብል፤ ኮይና ኣብዛ ጎነይ
በወዝቢ ሃንደበት፤ ሽዑ ወሲዱለይ።

መሊሱ ዓሚቁ በዚሑ እቲ ማያት
ምስ ወስኽኩሉ ንብዓት፤
ምስ በርተዐ ማዕበል ባሕሪ
ክትመጽእ ተለሚና እታ ናይ ሙሴ በትሪ።

ዎ ማእከላይ ባሕሪ ጓና ድየ ኾይነካ
ዝርንዛሕ ንብዓተይ ፈጹም ዘይራህራህካ
ዓሳ ነባሪኽ? ዘይናትካ ደየ ኾይነካ?
ፍቅረይ ንክትወስድ ምሒር ዝጨከንካ
ኣብ ቀይሕ ባሕሪ ተዝኽውን  ኔሩ እቲ ሓደጋ
ምሓዞ ናይ ሰጋ።

ብንጻሩ  እቲ ዓሳ፤ ሽግር ሓላፋይ እዩ ኢሉ መደዓዓሳ
ብንጻሩ ምሓለዋ፤ ኤርትራ ኣይትረሲዒ ኢሉ ምተላበዋ
ንዓይ ግን ካብ ርሑቅ ምጻተኛ
እንታዋይካ ኮይነ ኣነ ስደተኛ።

ሰብ ደልየ ኣነ ዘጸናንዓኒ………
ስድርኣ ክረኽቦም መገዲ ዝህበኒ፤
እቲ ማእከላይ ባሕሪ ብማይ ዝዘቕበበ
ይነጽፈለይ ዶኾን ንካልኣይ ሓመድበ።

ከይነግረላ ንስድርኣ ዘጋጠማ ኣብ መገሻ
የብለይን ኣድራሻ።

ኣራኺቡና ሸሽግርና
ካብ ምብራቅ ናብ ምዕራብ እወ ተሰዲዲና፤
ልዕሊ ዓቅምና እወ ተፋቲና
ዘመን ምስከፈአ ንሕና ግዳይ ኮይንና፤
ተወሊዳ ዕባይ ኣብ ኣርባዕተ ኣስመራ
                 እንተፈሊጥኩማ ሽማ ኔሩ ኑራ።