መቸም.....

 እንታይ ዘይሰማዕና ዘይረኣና
ዓሚ መስደመም ርኢና
ለዘበን መስደመም ሰሚዕና
ኣብ ገደናና፡  ድሕሪ ገዛና
ኣብ  ጽላል ዳዕሮና ባይቶና፡፡

እዞም ሃጸይ ኢሳያስ ንጉስና
ቆፎና ዝነግፉ እንተላይ ጁባና
ስጋና ዝበልዑ እንተላይ ዓጽምና
ዓጽምና ዝሰብሩ ፡ ዘንቁሩ ዓይንና
ዘልኣለም ዝውርዝዩ ብጥሜት ሕሰምና
ይነብሩ ኣለዉ ብናይ ሕልሚ ማና ።

እንተ ንሕና ' ሞ ብጥሜት ተፋሒስና
ካብቲ ዝነበሮ መመሊሱ ይመረና
ካብ ዓሚ፡  ለዘበን ይኸፍኣና
ካብ ቅድሚ ዓሚ፡ ዓሚ ይሕሸልና
ካብ ኣካሒዳ ፡ ለዘበን ከፊእና
ካብ ቱርኪ’ውን ናትኩም ገዲድና  ።

ክንዲ ረጒድ ጎጎና፡ ክንዲ ቂጫና
ክንዲ ሓፊስ ጸባና ፡ ክንዲ ሃንዛና 
ክንዲ ጻዕዳ ጣፍ ኢለና ጣይታና
ሓንቲ ባኒ ኰይና ስንቅና ቀለብና
ዘይተምውት ዘይተስርር ከኒና 
..........ወረ ንሳ’ኳ ጠፊኣ ተሳኢና  ።

እሞ ንመኣስ ደኣሉ እዚ ኹሉ መብጽዓ?
ከይሓዝኩም ከይቀረብኩም እንቅዓ
ዶስ ክንጽበየኩም ንባሕቲ ጥሪ
ተቓሊስና ከነጽንሓ ነዛ ሓጻር ዕምሪ

ክንርእዮ 'ቲ ዝመጽእ ዝቦቅል ዝፈሪ፡፡

እንታይ በሊዑ ደኣ'ዚ ህዝቢ
ክሰርሕ ውዒሉ ዝሓድር ከምዛ ንህቢ
ሓንቂቑ ዝተባህለ በቶም ጨካናት ኣሕሉቑ
መስኪናይ ብጥሜት ክሳዱ ሓሊቑ፡፡

'ቲ ዝበልዖ ተተሚኑሉ ብካሎሪ ብቢያቲ
በቶም ነውራማት ህግደፍ መላገጽቲ
 ተማባጺዖምሉ ነይሮም ዓሚ ከምዚ ወቕቲ
ህዝብና ከምድላዩ ክበልዕ ክሰቲ፡፡

ዓሚ ቅድሚ ዓሚ ሓሊፋ ብዘይ ፍረ
ለዘበን ውን ይመረና ከም ዕረ
ስለዚ መልስሉ ደኣ ህግደፋውያን
ብሓሶት ኣይትሽቅጡ ኣይትኹኑ ምስላውያን ።

ካልእ ደርፊ ደኣ ኣምጽኡ ይኣኽለኩም
መ ኒናዮ 'ቲ ናይ ዓሚ መዝሙርኩም
ቀይርዎ ግጥምኹም  ዜማኹም
መምይዎ  ፈት ግዎ ድርሰትኩም ቴማኹም 
ክንሰምዖ ጣዕሚ  ዜማኹም ቃናኹም !!!
.......................................................
ዮና ካብ ኣስመራ ታሕሳስ 2009