![[AIM] Asmarino Independent Media](/images/logo/ailogo.png){kind=logo}
ወላድ መኻን
ኣንቱም ኣቦ እዚ ወድኹም’ሲ....
ኣበይ ተሰዊኡ ይበሃል?
እህህህ...ኣይትተዓደሎ‘ዚ ወደይ
ዝሃበካ ተስፋ፡ ሂቡ ኣይኽላእካ
ዝኣተወልካ ቃል ኣማስዩ ኣይጥለምካ
ዘዕበኻዮ ከልቢ ኢድካ ኣይንከስካ
እሾኽ ምድሪ-ቤትካ ኢድካ ኣይውጋእካ
እንታይ ኢልኩም ኣቦ.........?
ብውላድካ ኣይቀረጽ ኣምዑትካ
ብርስትኻ ኣይደፈር ክብረትካ
ፈጣሪ ዓለም ብዘይምጻእ ኣይምጻእካ
እንክኸውን ብእትፈትዎ ውላድካ።
እዝጊሄር ብዘይ ምጻእ ክመጽእ ከሎ
ኣብ ዝባንካ ጋኔን ክሰርር ከሎ
ኣብቲ ኵናት፡ ኵናት ክዘንብ ከሎ
ኣየርኢኻ ኣይትርኣዮ ኣይትተዓደሎ።
ውሉድ ጥዑም፡ ውሉድ ሕሱም
እንተሎ ኣየቕስን እንተሞተ ኣየቕስን
እንተ’ሎ ኣብ ዝባን እንግደዓ ኣሎ
እንተሞተ ኣብ ማሕተም ልቢ ኣሎ።
ኣየ ‘ወ........
ክንደይ ክጥዕም ወላዲ ክቕድም ከሎ
እዚሄር ይፈቱ ሰብ እውን ይቕበሎ
ክንደይ ክጥዕም ህውከት ዘይብሉ
ፈልፋሊ ጽሩይ ማይ ዓለቕቲ ዘይብሉ።
ኣንቱም ኣቦ ኣበይ ዲዩ ተሰዊኡ...... ?
በል’ዚ ወደይ....
ባንዴራ ገቲሩ ካብ መሮር ምስ መጸ
ማሕለኻ በቲኹ ኣብ ብርሃን ምስ ወጸ
እሾኽ ዓጋም ወጊእዎ እንድኡ ከይበጽሐ
ከዋኽብቲ ከይወጹ ከይጸብሐ ከይወግሐ።
ኣብ ጸባብ ዒላ መኣውይቲ ዘይብላ
ኣብ ርስንቲ ሞቕሎ ኮንተይነር ጋብላ
ትንፋሱ ሓሊፋ ብኹርማጅ ሓለንጊ
ቶባ ደጊም ኢላ ፍትሒ ከተናዲ።
ኣቦ፡ ኣጆኹም ደሓን ክወግሕ ኢዩ........
እቲ መርገም ወላዲ ኣይሰድድን ኢዩ
እቲ ነጎዳን በርቅን ከኣ ክሓልፍ ኢዩ
