ህዝባዊ ምንቅስቓስ ሰላም ኣብ ኤርትራን ቀርኒ ኣፍሪቃን

ብዝሓለፈ ታሕሳስ 2009፡ ንሕና፡ ካብ ዝተፈላልለየ ሸነኻት ዓለምን ድሕረ-ባይታን ዝመጻእና ኤርትራውያ ብዛዕባ እቲ ኣብ ዞባና ከባቢና ሰፊኑ ዘሎ ዘይምርግጋእ ብሓፈሻ፣ ብፍላይ ከኣ ኣብ መንጎ ኤርትራን ኢትዮጵያን ዘሎ ዘይምቅዳው ክንዝትን ክንግምግምን ኣብ ለንደን ተኣኪብና ከም ዝነበርና ዚዝከር ኢዩ። 

እቲ ቀንዲ ዕላማ ኣኼባ-ለንደን ብዛዕባ’ቲ ንዓሰርተታት ዓመታት ተኸሲቱ ዝጸንሐ ስእነት ሰላም ብዕምቈት ብምግምጋምን ብምዝታይን፣ ሰላም ኰነ ምርግጋእ ኪፈጥሮ ዝኽእል ደረተ-ኣልቦ ጸጋን ረብሓን ብምልላይን ምስትብሃልን፣ ሰላም ዝነግሰሉን ዝዕምብበሉን መገድታት ንምፍታሽ ኢዩ ነይሩ።  ካብዚ ቅዱስ መንፈስ’ዚ ብምብጋስ ከኣ ንሕና ኣኼበኛታት ሽግር ዞባናን ሃገርናን ንምፍታሕ እጃምና ከነበርክት ሓላፍነትና ምዃኑ ብምግንዛብ መንገዲ ሰላም ተኸቲልና መንፈስ ተጻብኦን ህልኽን ኣጥፊእና ሰላምን ምርግጋእን ክሳዕ እንፈጥር ክንሰርሕ ምዃንና ኣረጋጊጽና።  

ስለ ዝዀነ ኸኣ ንሕና ኣኼበኛታት-ለንደን ኣብዚ ናይ ሰላም-ቻርተር ብምዕሳል ነብስና ሰሪዕና  መዘናታት  ብምፍራይን ብምውዳብን ምስ ሕመረት ራእይና ዝተኣሳሰረ ሓደ ሓያል ናይ ሰላም ምንቅስቓስ ፈጢርና ስራሕና ብምስልሳል ንመንግስትታት ዞባና ብምጕስጓስ ኣብ ጽምዶ ሰላም ከምእንሰርዖም እምነትና ኢዩ።    ነዚ ዉጥን’ዚ ንምትግባር ከኣ ከም መርሓ ዘገልግለና ናይ ሰላም ቻርተር እትነድፍን ኣብ ግንቦት 2010 ንዝካየድ ስፍሕ ዝበለ ኣኼባ እተዳሉ ኣሰናዳኢት ኮሚቴ መዚዝና ኣሎና።

እዛ ኮሚቴ በቲ ዝተዋህባ ሓላፍነት መሰረት ከኣ ድሮ ሓደ ናይ ሰላም ቻርተር ነዲፋ ንኣኼባ ዘድሊ ምድላዋት ኣብ ምስልሳል ትርከብ ኣላ። እቲ ዚስዕብ ኣኼባ ኸኣ ካብ 21 – 23 ግንቦት 2010 ኣብ ዓባይ ብሪጣንያ ንኽካየድ ብምውሳን ኣፈናዊ ሊስታ ተሳተፍቲ ኣዳልያ  ናይ ዕድመ መልእኽቲ ኣብ ምውዳድን ምልኣኽን ትርከብ ኣላ። እቲ ቐንዲ ዕላማ ናይ’ቲ ኣኼባ ኸኣ እቲ ብመሰረት ራእይና ተነዲፉ ንዘሎ ቻርተር ንምዝታይን ንምጽዳቕን ኰይኑ ኣብ ዞባና ተኸሲቶም ንዘሎዉ ሽግራት ዝሕግዝ መደባት ሰላም ንምቕያስን’ውን ኢዩ።

ኣሰናዳኢት ኮሚቴ ተምሳል ኣኼባ ግንቦት ንብዙሕነት ሕብረተ-ሰብ ኤርትራ ዘንጸባርቕ ዝኑቕን ጾታዊ ሱታፌን ማዕርነትን ዘማልእ ንኪኸውን ትጽዕር ኣላ። እቲ ኣኼባ ወከልቲ ናይ ፖለቲካውያን ተቓወምቲ፡ ስቪላውያን ማሕበራት፡ መራኸብ-ብዙሃን፡ ተቃለስቲ-መሰላትን ኣካደሚካውያን ምሁራትን ኪሳተፍዎ ትጽቢት ይግበረሉ።

ኣሰናዳኢት ኮሚቴ
This email address is being protected from spambots. You need JavaScript enabled to view it.