ሊብያ 400 ኤርትራውያን ኣብቲ ሃገር ክጸንሑ ፈቒዳ።

ሊብያ 400 ኤርትራውያን ኣብቲ ሃገር ክጸንሑ ፈቒዳ።

አኤፍፒ ዝተባህለ ናይ ዜና መርበብ ሎሚ ንግሆ ኣብ ዘውጽኦ ሓበሬታ: ሊብያ ብሓሙስ ንኣስታት 400 ዝኾኑ ኤርትራውያን ኣብ ሃገራ ንኽጸንሑ ፍቓድ ከምዝሃበት ገሊጹ። እዚ ውሳነ እዚ ዝተበጽሐ፡ ብዙሓት ሰብኣዊ መሰል ዝጣበቓ ጉጅለታት፡ እዚኦም ኤርትራውያን ንሃገሮም እንተድኣ ተመሊሶም፡ ስቅያት ከምዝወርዶም መጠንቀቕታ ድሕሪ ምሃበን ኢዩ ተበጺሑ። ንዝያዳ ትንትና ናይቲ ዜና ኣብዚ ረእዩ።

እቲ ዜና ከምዝገለጾ ብዝሓለፈ ሰሉስ፡ ኣምነስቲ ኢንተርናሽናል፡ ሊብያ ንኤርትራውያን ንዓዶም ንኸይትመልስ ሓቲቱ ኔሩ። እዚ ንሓተቲ ዑቕባ ይኹን ተራ ስደተኛታት ብዝምለከት - እንተድኣ ተመሊሶም፡ ኣብ ኤርትራ ስቅያትን ኣዝዩ ግፍዓዊ ኣተሓሕዛ ከምዝጽበዮም ኣብ ዘለዎም ፍርሒ ብምትኳር እዩ ኣምነስቲ ነቲ ጉዳይ ዝገለጾ። ኤርትራ፡ ንዝምለሱ ከም “ከዳዓትን” ካብ ወተሃድራዊ ኣገልግሎት ምህዳምን፡ ስለእትቆጽሮ መቕጻዕቲ ከም እተወርድ ሕሉፍ ዓመታዊ ናይ ሰብኣዊ መሰል ምግሃስ ጸብጻባትን ካብቲ ሃገር ዝመጽእ ዜና ይነግር ኢዩ። 

እዚ ኣብ ላዕሊ ዝተጠቕሰ፡ ኣብ መንጎ ሊብያን ናይ ሕቡራት ሃገራት ናይ ስደተኛታት ኮሚሽን ብዝጸንሐ ምፍሕፋሕ ኣስዒቡ፡ ንኤርትራውያን ስድተኛታትን ዑቕባ ሓተትን ዝተንከፈ ጉዳይ ኢዩ። ሊብያ እዚ ቤት ጽሕፈት ንኽዕጾ እኳ ኣዚዛ እንተነበረት ናይ ሕቡራት ሃገራት ናይ ስደተኛታት ኮሚሽን ግን ኣብዚ እዋን እዚ ብምጥን ዝበለ ኣገባብ ንኽሰርሕ ተፈቒዱሉ ምዃኑ ኣብዚ ናይ አኤፍፒ ዜና ገለጹ ኣሎ።

ምስዚ ኣብ ሊብያ ዝርከቡ ኤርትራውያን ዝተተሓሓዘ ዜና፡ ኢአንፒኣይ ዝተባህለ ናይ ዜና መርበብ ብዛዕባ ኣብ ባርክ (ድተንሽን ቦታ) ሊብያ ዝርከቡ 250 ኤርትራያን፡ ጉዳይ መዕለቢ ተገሩሉ ክብል ሓቢሩ። እዚ ኣብ መንጎ ኢጣልያን ሊብያን ዝተበጽሐ ስምምዕ ኣብ ባይቶ ኢጣልያ በጺሑ ኣሎ ይብል። እዞም ካብ ኢጣልያ ብዘይ ኣገባብ መሊሶምና ዝብሉ ስደተኛታት፡ እቲ ስምምዕ እንተድኣ ኣብ ግብሪ ዊዒሉ፡ ኣብ ሊብያ ኮይኖም ስራሕ ንኽረኽቡ ዕድል ክወሃቦም እዩ ይበሃል ኣሎ። ናይዚ ዜና ምንጪ ዝርዝር ኣብዚ ተመልከቱ።

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ንኤርትራውያን ብዘይ ምምላሳን ሰሪሖም ንኽነብሩ እትገብሮ ዘላ ጻዕርን ንመንግስቲ ሊብያ የቐንየልና ይብል መርበብ ኣዝማሪኖ።

Asmarino website thanks the Libyan Government for not returning Eritreans and for its efforts to provide them with work.