ካብ ስዊድን ክጥረዝ ትጽቢት ዝገበረሉ ዝነበረ ኤርትራዊ መንእሰይ ሎቶሪ ሲዒሩ

ሓደ 28 ዝዕድሚኡ ኣብ ስዊድን ብዘይ ሕጋዊ ኣገባብ ክቕመጥ ዝጸንሐ ኤርትራዊ ተስፋልደት ተስሎይ 1.2 ሚሊዮን ክሮኖር (ናይ ኣሜሪካ $ 167,000) ሎቶሪ ከምዝሰዓረ  ናይ ስዊድን ናይ ዜና ማዕከን ብዕለት 9/6/09 ኣብ ዘውጽኦ ዜና ኣመልኪቱ።

እዚ ምስ ሓው ክቕመጥ ዝመጸ ኤርትራዊ ዜጋ ናይ መንበሪ ፍቓዱ ከምዝተነጽገን ንኽጥረዝ ኣብ መደብ ከምዝነበረ ዝገለጸ ኣብዚ ላዕሊ ተጠቒሱ ዘሎ ማዕከን ኣብ ዝገበሮ ቃለ መጠይቕ እዩ። እዚ ስደተኛ ሓደ ካብቶም ስዊድን ንመበቆል ሃገሮም ክትጥርዞም ተቐሪባ ዘላ 12,000 ዝኾኑ ሓደ እዩ። ብዙሓት ካብዚኣቶም እተን ዝመጹለን ሃገራት ምስ ናይ ስዊድን ሕጋዊ ኣገባብ ስለዘይተሓባባበሩን ብዛዕባኦም እውን ናይ ስደተኛ ዝምልከት ስጉምቲ ስለዘይወስዱ ኣብ ላንጋ ላንጋ ይተርፉ ከምዝኾኑ ናይ ስቶክሆልም ወረዳ ፖሊስ ለዮ ጋርፐንሃይም ገሊጹ። 

ኤርትራውያን ስደተኛታት ናብ ሃገሮም ንምምላስ ኣዝዩ ኣሸጋሪ ምዃኑ ይግለጽ። ኤርትራ ሓንቲ ካብተን ብሰብኣዊ መሰል ምግሃስን ሕዝባ ኣብ ኣዝዩ ኣሰቃቒ ኩነታት ከምዝርከብ ናይ ሕቡራት መንግስታትን ካልኦት ናይ መሰላት ተጣባቕቲ ውድባት ብቐጻሊ ጸብጻብ ዝህባሉ ጉዳይ እዩ። 

ኣቶ ተስፋልደት ነዚ ረኺብዎ ዘሎ ዕድል ናይ ኣካላዊ ተራፒ ትምህርቲ መደብ ንምቕጻል ክጥቀመሉ ምዃኑ ኣብሪሁ።