ኣስታት 75 ዝኾኑ ኤርትራውያን ኣብ ባሕሪ ጢሒሎም።

እዚ ቐጻሊ ብዘይ ዘይሕጋዊ ኣገባብ ናይ ሃገራት ኤውሮጳ ዝካየድ ናይ ሰባት ምምልላስ ሸቐጥ ደው ምእንቲ ከብሉ ናይ ሊብያን ጥልያንን ሓይሊ ባሕሪ ንባሕሪ መዲተራንያን ኣብዚ ዓመት መጀመርታ ምክትታትል ይገብሩ ኔሮም። 

እቶም ዝተረፉ ብዛዕባ እቶም ዝሞቱ ብጾቶም ብዙሓት ማይ ባሕሪ ምስሰትዩ ከምዝሞቱን ሬሳኦም ድማ ናብ ባሕሪ ከምዝተሰንደወ ገሊጾም። ናይ ጥልያን ፖሊስ ነዚ ነገር ኣሻብኡ እኳ ከረጋግጽዎ እንተዘይከኣሉ ክእመን ዝከኣል ነገር ምዃኑ ሓቢሮም። እዚ ከምዚ ዓይነት ናይ ሰብ ህይወት ምጥፋእ ብቐጻሊ ዝርእ ነገር እዩ ይብሉ እቶም ምንጭታት።

መንግስቲ ጥልያን ኣብዚ ቐረባ እዋን ናብ ሃገራ ምእታው ብማእሰርትን መቕጻዕትን ድሕሪኡ እውን ናብ ምጥራዝ ዘብጽሕ ዘይሕጋዊ ገበን እኳ እንተገበረቶ ነቲ ቐጻሊ ዋሕዚ ስደተኛታት ጠጠው ከትብሎ ኣይከኣለትን።

ብኣሽሓት ዝቑጸሩ ኣፍሪቃውያን ጌና ናብ ኤውሮጳ ንምምጻእ ኣብ ሰሜን ኣፍሪቃ ግደኦም ይጽበዩ ከምዘለዉ ይሕበር።