መልቀስ ንፕሮፈሶር ሓወይ የማነ ገብረ እግዚኣብሄር

ወየዶ! ኢለ ከልቅሰልካ!!!!!!

የማነ ሓወይ ባዕለይ ከልቅሰልካ

ዓሪፍካዶ ከምይከ ቀነኒኻ

ለሚድካዮዶ እቲ ሓድሽ ገዛኻ

ኣነስ ኣይከኣልኩን ብድሕሬኻ

ምኽኣል ስኢነዮ ናፍቖትካ

ይሙን ሓወይ እምብዛ ተሃዊኽካ።

የማነ ሓወይ ዓቢ ናይ ገዛና

ዝለዓለ ምሁር ካብ ኩላትና

ታተ እናበል ዘዕበየና

ኣፍ ክንከፍት ሃ ሁ ዘበለና

ከይንስበ እናሓቖፈ ዘታተየና

ብዙሕ ዝተመረቀ ካብ ገዛና።

ፕሮፈሰርዶ! ክብለካ መምህር ሓወይ

ይመስለኒ ነይሩ ዝፈትወካ በይነይ

ብዙሓት መጺኦም ኣብዚ ጎነይ

ዝርዛሕ ዝነብዑ ማዕረ ማዕረይ

ካበይ ከምዝመጹ ዝፈልጦ ነብለይ

የማነ ሓወይ ብርሃን ዓይነይ

ኩሉ እምበር ሓዚኑሉ እዝሓወይ

ከመይ ድዩ ነይሩ ጠባዩ ዝሓወይ

ቡዙሓት ነቢዕም ኣብዚ ቕድመይ።

ዳዕሮዶ ክብለካ መጋቢና

ሳግላዶ ክብለካ መጽለሊና

መሞናዶ ክብለካ ጥዑም ጨና

ጸሓይ ኔርካ ንስድራና

ዓንዲ ማእከል ናይ ኩልና

ብሳላኻ ካብ ጸገም ወጻእና

ብኣኻ ተሓቢኖም ወለድና

ትምህርቲ ክንቀስም መሪሕካና

ክቡራት ኢና ንስኻ ዝሓውና።

ዝነበረ ስንብታኻ ክነግረካ

ብዙሓት መጺኦም ዝፈልጡኻ

ስለ ዝፈትዉካ ስለዘኽብሩኻ

ካብሩሑቕን ቀርባን መሊኦሞ ኣዳራሽካ

ስለ ዘይትሪኦ ኣነ ክነግረካ

ዘይጠዓሞም ጉሃዩ ስል ዘየፋነዉኻ

የማነ ሓወይ ብዙሕ እዩ ፈታዊኻ

ተሓቢነ ኮሪዔ ዝኾንኩ ሓፍትኻ

ኣንቢቦምን ነጊሮምን ዝፈልጡኻ

ጸልዮም ደጊሞም መረቑኻ

ዝተረፈ የለን ኩሉ ሰንዩካ።

ኣንታ ሓወይ ጥዑም ቃሉ

ከዘናግዓክ ከሎ ህድእ ኢሉ

ከረድእ ከሎ ትሕት ኢሉ

ዘይሓርቕ ትዕግስቲ ኣመሉ

ሓወይ እባ ኸደ ሙሉቕ ኢሉ።

ኣብጽሓለይ ደብዳበ ነቶም ወለድና

ንገረልና ድሓን ከምዘለና

ናይ የማነ መገሻኡ ቀልጢፉና

እንታይ ክንገብር ነዚ ታዕዲልና

ኣምልኽ ካብ ፈቐዶ መዋእልና

ከምድላይና ኣይኮነን ከም ጽሑፍና

ዝተርፍ የልቦን ክንስዕበኩም ኢና

ንየማነ ሓወይ ንኸይሻቐል ኣህዱእልና

ብዙሕ እዩ መጺኡ ክድብሰና

ዝተርፈ የልቦን ዝፈልጥ ንዓና

ትዕግስትን ጽሮትን ኣምልኽ ይሃበና

ጽንዓት ክንገብር ኣቦይዝጊ በረኸት ሃበና።

ትፈትወካ ሓፍትኻ

ኣስተር ገርዝጊሄር