ብስራት ንግሆ

ተዓገስ ኹኹናይ : ነቑ ኣርሓ ደርሆ

በቲ ረጒድ ድምጺ : ሓባሪ ንግሆ

ንስካ ኣይትስሕትን : ጸኒሕ ናይ ኣቦካ

ሃየ ደጋግሞ : እቲ ጉሩም ድምጽካ

ወጊሓ’ዶ መሬት : ኮይና ከብዲ ኣድጊ

ተዓሪቖምና’ዶ :  ሎምስ ኣቦይ እዝጊ

ተንሲኦም’ዮም በሎ ፡ ዎዮም ሰብ- ቖጽሊ

የንፋሕኽ ብእግሩ ፡ ናይ መን ሰጋር በቕሊ

ዶው ኣይበል  ፡ ኣብ ቅድሚ ጥሕሳ

ከይጻውተሉ ፡  ከም ናይ ልደት ቃርሳ

ጸሓይ ሕዝቢ ፡  ሊኢካ ጨረርታ

ሚስኪን ሓዊ-ለቶ ፡  ጠፍእዋ መስታ

ህግደፍ  ኣሎኹ ፡  ከይብል ከም ቐደሙ

ሕምብርቱ ረጊጾም ፡ ነጋሪት ሃረሙ

ክሳድ ምሓዝ ከሎ ፡ እንታይ ይዓብስ ምኹላል

ጥሩምባ ሃሪሞም ፡ ብኮፉ ጀነራል

ኣብ መንጎ ህዝቢ ፡ እንከሎ ጉሒላ ጠላሚ

ጽባሕ ዝብልሲ ፡ እንታይ ምስ ኮነ ሎሚ

ቃልሲ ኾይኑ ፡ ኣንተበልኩ ሰንከልከል

መኣስ ይወድቕ ፡ ኣነ በዓል መትከል

ኢሉ ነዲሩ ፡ ወዲ ይክኣሎ

ክሕለብ እቲ ፡ ጸባ መኩእዎ ጎሎ

ኣለና ምሳካ ፡ ኣንታ ሰራሕ ቅያ

ፎርቶ ተመሲሕካ ፡ ድራርካ እንዳፍቕያ

ከምኣ’ያ ኢዱ ፡ ደጊምኩም ይፍለጡ

ክትምከቱ እኩም  ፡ ጽጉባት ወጣጡ

ስልጣን ዝሓዘ ፡ ዓራት እንዳማቱ

ምትሓዙ እዩ’ምበር ፡ መገዲ ኣያታቱ

ገለ ሙላቕ ፡ ተረፍ እንተ ሃሊካ

ዘይሕሎ ክትሕሉ ፡ ጸላእ ጸልኢካ

ንሰማይ ተንቃዕርር ፡ ገበል ኣብ እግርካ

ሃጠው ቀጠው ግደፍ ፡ ተጠቀም በትርካ

ጎሪሑ’ዩ ሎሚ ፡  ኩሉ መላኣ ህዝቢ

ኣቲካ ጸኒሕካ  ፡ ዕኾት እንዳ ንህቢ

ምጥፍእካ እንተ’ሒሹ ፡ ዓራርቦ ጸሓይ

ደምሰስትስ ኣሎና ፡ ከይትገድፍ ደሃይ

ኣቱም ካብ የብለይ ፡ ናብ የብለይ ትብሉ

እዝንኩም እንዳ ሰምዔ ፡ ልብኩም ተንዅሉ

ሃገር ሒዝኩም ፡ ሃገር ተጣራዒት

ግደፉ ጽገቡ ፡ ድቓስ ጥንቅልዒት

ኣዕዋፍ ሃግረይ ፡ ተንስኣ ዘምራ

ኣይጨነወክንን ድዩ ፡ ‘ዚ ሰናይ ኣዝመራ

ዕንጭራር ህግደፍ ፡ ድምጻ ተሎጉሙ

ኣበይ ከይጸንሕ ፡’ዚ ዘርኢ መርገሙ

ፍሉይ ኣይነበረን ፡ መዓልቲ ምስ ለይቲ

ቒቕ..ቒቕ ከይሰማዕና ፡ እታ ሳልሰይቲ

ኣበይ ከንድቅስ ፡ ሰብኣይ ምስ ሰበይቲ ! !

ኣበይ ከንሳደድ!  “ኣለና” .....................

መረጸ ኣስመላሽ

02. 01. 13