ኤርትራዊ ንሃገሩ እቲ’ምሰሉ ንመንበሩ ተቓሊሱ (ራብዓይ ክፋል)

ርእሰ-ከተማ ሃገረ ኤርትራ

ጽቡቕ ትርኢታ መዲና’ስመራ

ቅርጻ ሮማዊት መሳጢ ሕብራ

ክፋል ናይ ገነት ጥዑም ኣየራ፡

ጸሓይ በሪቑ ናጽነት ኣትዩ ክዕለለላ

እንከይ ቀጸለት ቅድሚት ኣቢላ

ንድሕሪት ከይዳ ታሕቲ’ንቆልቍላ

ኣብ ርሑቕ ገጠር ኣብ ምዕራብ ዘላ

ንኣዶብሓ ትጽበያ’ላ!!

መልክዕ ህንጻኣ ሕብሩ ሃሲሱ

እምኒ ተሪፉ ቸመንቶ’ልጊሱ

ዚንጎ መሪቱ መንደቕ ፈሪሱ፡

መትረብ ማያታ ኩሉ መሪቱ

ዘይህብ ኮይኑ ኣገልግሎቱ

ፋኛቱራኣ ሓመድ ተደብዩ ጠፊኡ’ዒንቱ

መብራህቲ የለን ዉሽጣ ጸልሚቱ፡

እቶም ጥጡሓት ጎደናታታ

ቅጥራኖም ከይዱ መን ቁሊሕ ክብላ መን ክጥምታ

ዘዐሪ የልቦን ትርፎ ዝኹዕታ።

ናይ መግቢ ስእነት ከይኣኸሎ ህዝባ

ብዝስተ ማይ መብራህቲ ላምባ

ብጋዝ ብፋሓም ኣትዩ’ብጸበባ፡

ንሳ ክትሕደስ

ከመቲ ናይ ጥንታ ኮይና ክትምለስ

ኣብኣ ዝነብር ዜጋ ክሕጎሰ

ነቲ መላኺ ኣይብሎን’ዩ ደስ።

ኣብ ውሽጢ’ስመራ ህዝቢ ዝነብር

መታን ክሻቐል ወትሩ ክሽገር

ብቕድሚ ሕጂ እኽሊ ወዘተ … ዝኾነ ነገር

ኣብኣ ከይኣቱ ኣዚዙ ኔሩ እቲ ዲክታተር፡

ዝጨነቓ’ደ ብቢሑቕ ጌራ

ከተእቱ’ላ ናብ ውሽጢ’ስመራ፡

‘ታ ዝፈተነት ‘ታ ዘይሰለጣ

ብመንነታ ህዝቢ ዘይፈልጣ

መዲርላ’ዩ ዲክታተር ባዕሉ

እኽሊ ብቢሑቕ ይኣቱ’ሎ ኢሉ!!

ናይ ኣስመራና ጥንታዊት ቦታ

ዓበይቲ ትካል ፋብሪካታታ

ከይተታሕዘሎም ከም መተካአታ

ዓንዮም ተሪፎም ኮይኖም ንዛንታ፡

ነባር ጽርግያ ጽቡቕ ቅጥራኑ

ከም ዘይነበረ ኩሉ ክዓኑ

ሓዲሽ ጽርግያ ሎሚ ክህነጽ ሕርሚ’ዩ ኮይኑ።