![[AIM] Asmarino Independent Media](/images/logo/ailogo.png){kind=logo}
ወርሖ!
ወርሖ!
ሰፈርኪ ሰማይ ምሕዳርኪ ላዕላይ
ዕምቆቱ ውቅያኖስ ባሕሪ-ኸብዱ ቀላይ፡
ዓንቀጹ ገፍሖ ጋሕንትዕርብ ምስተረሖ
መስተንክር ተፈጥሮ ዘንቃዕረረ ዘይበጽሖ።
ስፍሕት ናይ ክዳንኪ ጠረፍ
ዘይዕቀን ብሜትሮ
እመት-ናጽነት ዘይጥርሮ።
ስለ’ዚ’ኮ’ዩ
በ’ድንቖት ብሃንቀውታ ንዝቛምተኪ ብማዕዶ
ካብ ህድሞ ካብ ኣጉዶ፡ መጋርያ ካብ ዝተኣጉዶ
ንስኺ ሓንቲ
ከም መርዓት ጉልብብቲ፡
ብጾትኪ ድሙቓት ተላሃይቲ
ኣእላፍ ከዋኽብቲ።
ኣብ መስርሕ ናይ ለውጢ ወደቕቲ ተንሳኣቲ
ምህርቶም ዘንጸባርቕ ከም መብራህቲ
ንጸምጸም ናይ ለይቲ፡ ከምስሎ መዓልቲ።
ብማዕረ ከየዳ’ለ ከይለክዐ ብማይክዖ
ዝቃለስ ዝመጣጠር ንኹሉ ክበጽሖ
ንጸልማት ክብድሆ ከማዕርዮ ምስ ንግሆ።
ስለ’ዚ ናትኪ እማነት’ሲ ወርሖ
ንንቕሎ የንግሆ
ንመንገዲ የብርሆ።
ንኣይ’ኳ በታ ዘላትኒ ዓቕሚ
ክሳብ ለይቲ ሎሚ ዘይትርስዓኒ፡
ማለት’ሲ፡ ብቖልዓይ ኣትሒዘ ክሳብ ዝዓቢ
ጠለ-በጊዕ እንክናቢ፡
ከምገለ ብወዝቢ
ሕድሪ ተሰኪመ፡ እንተነቒለ ከብጽሕ መልእኽቲ
እዋን ወገግ ከይበለት የስፍል መንገዲ።
እሞ ምናልባት ደመና ተሸፊኑ
ጽላሎት ኣብ ጎድነይ ክዓልብ እንተጀሚሩ፡
ኣቤት ዛ’ልበይ ትህወኾ!
ምኽንያቱ ኣብ ጽልግልግ ዕጹው-ማዕጾ
ዘይኮነስ
ሙግሓተይ ምስ ጽፍሒ ባናኺ’ዩ ወርሖ
ብርህለይ ጥራይ ድመቕለይ ከም’ቲ ልበይ ዝብህጎ።
04/08/2015
ዳንኤል ተስፋዮውሃንስ ተኽለጊዮርጊስ
