ካብ ተሓቢእካ ዕረቑኒ

በለና ብደወይ ቅቦሩኒ

እዚ ኹሉ ብድዐ እዚ ኹሉ ንዕቐት

ተቐሚጡሎ ኣብ ደብተር ወረቐት

ዘይርሳዕ ዝበደልካዮ ንዓና ንጎረቤት

ኣቃጪጭካ ንዓበይቲ መንግስታት

ሓለቓ ዓዋሉ ዝራሓቖ ስነስርዓት

ምስ ሸ.ራኣት ሰዓብቱ ዘይዉጁሃት

በላዕቲ በይኖም ኮለስቲ ሱሱዓት

ጥዑይ ዘይመኽሩ ብዘይካ ክፍኣት

ንወራዙት ዘጸልሙ በዳዕቲ ስድታት

ደብዳበ ንፕ. ኦባማ ደብዳበ ንኢጋድ

ንዓያሹ ኣዳህሊልካ ተሓቢዕካ ምስጋድ

መልሓሱ ሜትሮ ለዛ ዘይብሉ ጀልጋድ

ብማዕዶ ዝመስል ጅና ሒዙ ዘይሰድድ

ተተዓዘብካዮስ ሓሳዊ ተግባሩ ሕንግድ

ይዋኣዮም በዚ ዝታለሉ ኣሕዋትና

ዝበሎ ዘይዝክር ጽሉል መራሒና

ትጽርፍ ውዒሉ ንጽባሑ ናብ ለመና

ነዚ ዘይትዕዘቡ ተደንግጹ ደቅዓድና

ህግደፍ ዝኣዘዘን ምስ ኣረጋ ክምሸጣ

ዘይ ሳዕሲዒት ካልእ ከም ዘይፈልጣ

ካብ ሰብ ናብ ኣራዊት ከም ዝልወጣ

ሃገርና ኣጽኒተናኣ እናረአያ እናፈለጣ

ክንዲ ሓዘን ቁኖ ሽልማት ተራእዩወን

ደቀን ባሕሪ ናሰጠሙ ወርቂ ተኾሊዐን

ጨካናት ኣረገውቲ ሕልና ዘይብለን

ከም ደቂ ሂዋን ማህጸንዶ ይህልወን?

ዲዕዲዕክን ዕብዳንምበር ጥዕናይኮነን

ሓኪም ተረኣያ ከይበርትዐ ሕማምክን

ክንጽሊየልክን ምሕረት ተውረደልክን

ክትሓውያ ከይትሓውያ ጽባሕ ንሪአክን

ጓይላ ህግደፍ ኣይኮነን ሓልዮት ንሃገር

ወርቂ ንምርኣዩ ናይ ገላጥም ውድድር

ሰብኡተን ኣያየ ወርቂ ሰዓቱ ንምጅሃር

መዋእለ ፊልመ ደስነት ዘመን ድሑር

ጌና ዘይማዕበሉ ኮምፒዩተሮም ኣባትር

ንጀርመን ኣንቂሉ እንዳኩኡ መሲልዎ

ዝሓሰቦ ብወግዒ ብዓጀባ ከቕበልዎ

ሕትት እንተበለስ ብሓላፍነትካ በልዎ

ሃጽሉዩ ዝበለ ብቑጣዐ ሽኩሽኻ ሒዝዎ

ዘይሓፍር ዘይኮነ ነገር ዝዝምር

ህዝቢብጡሙዩ ብሓሶት ዝጀሃር

ልቢ ሰብ ደፊኑ ኣዒንቱ ዘዕውር

ዕቡድ ከልቢ ዝተዛረቦ ዘይዝክር

ህዝቡ ኣዋሪዱ ነውራም ዘይሓፍር

ኣነ ዝገርመኒ ናይቶም ዝኣምንዎ

ክሕሱን ክልኽብጥን እናሰምዑዎ

ሰሪዩዎም ኣይፋልካን ንኸይብልዎ

ጋብር ዶርዓንቶ ተሓጸቡ ንኽትደፍርዎ

ኣንታ ኣበየለዉ ቶም ምዑታት ጀጋኑ

ካብ ብዙሓት ሓደ ወስ ዝብል ተሳኢኑ

ነዚ ፈርካሽ ስርዓት ብድሆ ኢሉ ዘዕኑ

ብዓዲዩ ተስፋና ኣብዚ የለዉን ዝጭክኑ

ኣትሪርኩም ተቓለሱ ንደገ ኣይትእመኑ

ህግደፍ ኣብቂዓ ከም ጨው ሓቒቓ ቂሂማ

ደጊም ኣኺሉዋዩ የለን ዝጥግና ዘልሕማ

ብተንኮል ስለ ዝተባዕጠት እንሆ ሰጢማ

መሰረቱ ዘይጠዓየ መወዳእትኡ ኣልቦ ጻማ

ካብ ተሓቢእካ ዕረቑኒ

በለና ብደወይ ቅቦሩኒ

ኤረና ኩሑሎ

ሎም ዘመን ሓዲኡሎ

ተስፋማርያም ወ/ጊዮርጊስ