በሎ'ም ሰምስሞምየ  እንታይ ከይሕሞም
ይብሉ ነይሮም ቀዳምት  ኣብ ኲናት እንተገጢሞም
ድሕር ከይበሉ ንጸላእቶም ኣድኪሞም
እነሆ ጻምኦም ብዓወት ዛዚሞም
****
ሓላፍነቶም ንሓዲስ ወለዶ ኣሰኪሞም
መስኪኖት ደቅና ጻማ ወለዶም ተሓሪሞም
ብጭም ከይብሉ ኣፎም ተዓሚሞም
ወስ ዝበሉ'ውን ብሓይሊ ተደርዒሞም
ኣካለ ስንኩላት ከይተረፉ ብጥይት ተሃሪሞም
ክንደይ ኣብ ጎዳጉዲ ማእሰርቲ ኣእዛኖም ጸሚሞም
*************
መንእሰይ ሃገርና ተስእ ተበራበር
ሓንቲ ኢድ ኩን ኣይትፈላለ ሕበር
ምእንቲ ሃገርካ ገለ ነገር ግበር
ብሓይሊ ህግደፍ ብዙሕ ኣይትሸበር
****
ቦኹባዅ ሓይሉ ብቅልጽምካ ስበር
ንስኻ ኢኻ ተስፋ ህዝቢ ተስፋ ሃገር
ካብ ኣብ ስደትን ከርተትን ኣብ ገዛእ ሃገርካ ንበር
ብናይ ህግደፍ ሽጣራታት ፈጺምካ ኣይትጠበር
****
ንጸሊም ታሪኹ ኣፍርስ ንዲክታቶር ቅበር
ኣይዞኻ ኣይትፍራህ ኣይኮነካን'ዩ ኣበር
ሓግሕጎ ንውልቀ መላኺ ግበሮ ብዘይ ኣሰር
ኣብ ናይ ታሪኽ ጎሓፍ ደርብዮ ኣስምዮ መራሒ  ነበ'ር
****
ተስእ ተበራበር ሓዲሽ ስርዓት ፍጠ'ር
ሱቅ ኢልካ ኣይትተዓዘብ ህዝብኻ ክሽገር
ሱቅ ኢልካ ኣይትርአ ወላዲኻ ክእሰር
ተስእ ተበራበር ህዝብኻ ክኽበር
****
ሱቅ ምባል ኣይጽቡቅን ህዝብኻ ክሓስር
ኣርክብ ብእዋኑ ሀገር ከይንኸስር
ተስእ ግጠሞ ንህዝብኻ ኣበስር
ተስእ ቅያ ግበር ህዝብኻ ኣሰራስር
****
መንእሰይ ሃገርና ተላዓል ድፈሮ ንመራሒ ህግደፍ
ይገለል ይደርበ ኣብ ናይ ታሪኽ ጎሓፍ
ሓዲሽ ታሪኽና ብብርዕኻ ጸሓፍ
ኩሉ ኣብ ቅድሜኻ ዝዕንቅፍ ኣይትግደፍ
****
ንህግደፍ ኣልጊስካ ጽቡቅ ታሪኽ ግደፍ
ብጽቡቅ ክትዝከር ሞት ዘይተርፍ
ህዝብኻ ክሕጎስ ብዛዕባኻ ክደርፍ
ንዲክታቶር ክፈርድ ከዋርድ ክጸርፍ
****
ሓይልታት ምክልኻል ሰልምታይ ይብጻሕኩም
እንታይ ትጽበዩ እንዳ ተበሳበሰ ህዝብኹም
ካንዶ! ተዓንዲኩም ወይስ ተገዲድኩም?
ንብዙሕ ዓመታት መስተንክር ርኢኹም
****
ተለዓሉ ኣንጻር ዲክታቶር ምእንቲ ህዝብኹም
ዋሕስ ነጻነትና ንስኹም እንዲኹም
ሃየ ተላዓሉ ኣይትጥለሙ ሓደራኹም
ውልቂ መላኺ ኣይኮነን ጐይታኹም
ምስ ህዝብኹም ደው በሉ ንሱ'ዩ ሕቊኹም::
****
ዓወት ንኹሎም ተቃለስቲ ምእንቲ ደሞክራስያዊ ለውጢ
ውድቀት ንውልቀ-መላኺ
ዝኽርን ክበርን ንስውኣትና
ኣንቲ ኤረይ ኩሕሎ
ራህዋኺ ቀሪቡሎ
ወዲ ኣፎም ክዕሎ

ወድ ዓድ ካብ ስደት 2 መጋቢት 2011