ንዓኻ ኣብ ደልሃመት - ንሓውኻ ኣብ ጸልማት
ኣነ ዘሕዝኑኒ - ወለዲ ሃገርና
ኣዴታት መሳኪን - ሓቑፈን’የን በረድ
ዝቐደመ ሓዘን - ገና ብንግሁኡ

ናይ ስዉእ ሓውኻ - ብጥይት ጸላኢ
ናይ ሕጂ ገደደ - ቀታሊ ካብ ገዛ
ዓቢ ሓውኻ - ጽጋቡ በርቲዑ
ስልጣን ምስ ጨበጠ - ብኢደ ዋኒኑ

ዕላማ ስዉኣት - ኣንፈቱ ኣስሒቱ
ንጥቕሙ ኣውዒሉ - ንውልቃዊ ረብሓ
ሓየት ሰራዊትና - ወጊድ በሎ ደጊም
ሓውላል ትእዛዝ - ሓድነት ዘመንምን

ንሃገር ዝረብሕ - መዓስ ጠፊኡካ
ንእሽቶይ ሓውኻ - ናብራ መሪርዎ
ተነፊጉ መሰል - ክብሪ ንእስነቱ
ኣብ ዕሸል ዕድሚኡ - ስደት መምረጺኡ

ዓዱ መሕረሚኡ - ስርዓት ፈንፊኑ
እንተዝርህዎ ኣብ ገዛ - እንተዝጣጥሕ ናብራ
ሙኻኑ ተሪፉ - ናይ ስሱዓት ጊላ
ምጨከን’ዶ ኢልካ - ምመረጸ ስደት

ናብራ ዓዲ ጓና - ሙኻን ካልኣይ ዜጋ
ሓፍትኻ’ውን ከምኡ - ንቡር’ያ ስኢና
መርዓን ደርዓን - መዓስ’ድኣ ጸሊኣ
በረኻ ኣጻምእ - ክትሰግሮ ብእግራ
ምዝንጋዕ ኣይኮነን - ከምቲ ዝበሉኻ
ሓሲምዋ’ዩ ፍጹም - ናብራ መሪርዋ
ዘይረብሑ ጓሓላሉ - መጻወቲ ኮይና