ቶባእ!!!
እርጋን’ድዩ ዕብዳን ሕርቃን’ዩ ስኽራን
ምንጪ’ዚ ኹሉ ስሕታን።

ሰብኣይ ኮይኑ ዋዕላ ውዒሉ
ወርቂ መንበር ሰፊሩ ክዛረብ ተኣኒኑ
ሃለዋት ግዝኣቱ ንዓለም ከብርሃሉ።
እንተረኣኻስ!

ብኹሉ መዳይ ስኢንዎ ምእላይ
“ላይ ኣናዘር ላይ” ጥራይ
ቀላሲት ዘረባ ብሒታቶ ውራይ።
ዘገርም’ዩ መዐቀኒ ዘይብሉ
ተጎቢኡ ብኣሉ።

መዋእል ዝምስክሮ ናይ ሂወት ተመኩሮ
ዝሓረረ’ፈኩስ ዝነቐጸ’ነቅዝ
ሹመኛ ግን ክንድ’ዚ ‘ነይሕልኩስ!
ዘገርም’ዩ!

ትርኢቱ ዕሉም ኣዋርቕ ስሉም
ቁመቱ ገደል ጉልበቱ ጠብደል
መልሓሱ ዓንደል ዘረብኡ ዳንዴር
ኣይንህዝቢ ኣይንሃገር
ምእንቲ ስልጣንሲ ‘ዙኹሉ ዓገርገር።

ካብ ቃሉ ከም ንሰምዖ
ጥሜት ህዝቢ ኣይተሰመዖን
ምጥፋእ ሃገራዊት ጋንታ ኣይበጸሖን፣
ኣብ’ዚባ’ነሆ ዘመናዊ ፈርዖን

ህዝቢ ይመሖ ሃገር ይነዖ
ንሱ ምስ ጭፍርኡ ይሕጸን ይምርዖ።

ኣብ ቅድሚ ካመራ ኣብ ቅድሚ ኣሬባ
ንምስክር ዘሕንኽ ዘረባ።
ወይሰብደቀይ እንታይከ ኽትብሉ
ዛርቲ ድኣ ከይህሉ
ኣብ ሓንጎሉ ሰፊሩ ዘሽካዕልለሉ።

ምናልባት ግን ካብቶም ኮራኹሩ
መቓብሩ እናኾዓቱ ዘጣቕዕሉ
ጽግዕ ኢሉ ዘኽፍኣሉ ዘጸብቐሉ
ሕሹኽ ዝብል’ዶ ስኢኑ
ብጻዕቂ ዓጀውጀው ኣቢሉና ቀንፈዘው።

ለከ’ሓቆም’ዮም ወዶም ጓሎም
ቶባእ ኢሎም መዓንጣኦም ኣሲሮም
ዝፈትውዎ ጠንጢኖም ዝዕዘሩ ንሓላሎም
መስተርሆት የውርደሎም።