ይወግሕ ይዓርብ
ይበርስ ይሰርብ
ይሃምም ይነጉድ
ይዘውር ይዓውድ
ይኣርግ ይመውት
ይትካእ ብመቕርብ
ንኽብሪ ንመዓርግ።
 
ይጽብጸብ መዓልቲ
ክኣክል ሳምንቲ
ክሰርዕ ወቕቲ።
 
ይበርሁ ከዋኽብቲ
ሰማያት ሸለምቲ
ብርሃን ናይ ለይቲ
ናይ ተስፋ ትእምርቲ
ናይ ለውጢ ሓበርቲ።
 
ይጽብጸብ መዋዕል
ሃዲኡ ንዘስተውዕል
ብኣንክሮ ዘስተባህል፣
ዝሓሊ ዘናብር
ዘቐምጥ ዝኸዝን
ዝዓቁር ዘዋህልል
ንውሉድ ዝኸውን።

በ’ንጻሩ!
ዓመት መጽአ
ዝኸንብ እናፈለጠ
ኣብ ዙፋን እንተተቐመጠ!
እዋን ‘ናተለወጠ
ኢዱ እንተ’ረማጠጠ
ከምዘይረኣየ እንተ’ጽቀጠ!
ግርማ ተቐንጠጠ
ፍናን ተቖጥቆጠ።

እነሆ!
ሕጂ’ውን ከም ቀደሙ
ሓደ ዓመት ተዛዚሙ!
 
ክልተ ሽሕ ተበሊዑስ
ዓሰርተ ተደጊሙ
ከይዱ ሓሊፉ ካብ ዋንኡ ሃዲሙ።
 
ብፍላይ ዛ'እዋ’ና              
ሰላሳ ዓመት ኣብ በረኻ
ዕስራ ዓመት ኣብ እንዳና
ተተቲዑ ከም ሽባኻ!
ፍርቂ ዘመን ተኾርምዩ
ዕዮ-ምስክሩ ደርብዩ።

እንታይ ተጌሩ
ኣበይ ተዋዒሉ
ተባሂሉ እንተተወጢሩ
ክመርር’ዩ ተዝካሩ።

እዚ!
በዓል-እዋን ዝጸየቖ
ንወራሲ ኽጨንቆ
ተኺሉ ዘጽደቖ!
ንሓዋሩ!
ለባም ክብርቁቖ
ዓቕሚ ከይጽንቀቖ
ንዘትየሉ ነርቅቆ
ከምዓቕምና ነስንቆ
ከይሰኣን መዋድቖ።