ክዘልልዩ ዝመስል መደልደል ክሰብር
ኣጠማምትኡ’ይግድን ይእነፍ’ሎ ይንድር።
ዝምለኽ ስለ ዘይመሰሎ ኣሚኑ’ዩ ድርዑ
ሻዲኑ’ዩ ጸኒሑ ፋኒኑ ብዙሕ ተበዲዑ።

ብታል ከይትሕዞ መትሓዚ ስኢናትሉ
ኣማራጺ ስኢና ሰንሰለት ኣእትያትሉ።

ክልተ ሳብዕቲ ክሕጸብ ይኣይ እንተሓሾ
ስንቂ ማጨሎት ተዳልዩሉ ጥሕኒ ኮሮሾ።
መንሞ የሕጽቦ እንተበልካስ ዕሹ ምሹ
ለካስ ተኸተልቱ ዕቡዳት ካብኡ ዘይሕሹ።
ዕብዳንሲ ያኢ ፋሺን’ዩ ኢሉ ስለ ዝመሃሮም
ንሶም’ውን ክፍርጥጡ መደልደል ሰቢሮም።

ዓዲ’ሞ ዋዛ ድያ ሰንሰለታ ኣኻኺባ
ጎብየን ሰዓብቱን ብሰንሰለት ኣብ ዛሬባ
ገለ ካብ ደርዓንቶ ገለ ካብ ዓዲ ራእሲ
ብጀሪካን ጌርካ ያኢ እንተኾኖም ፈውሲ።

ንዓይላ ምልእቲ ጨንቀብ እናበልካ ከተሕጽብ
ዓዲ ተኣሊሻ ተዋሪዳ ጸላኢኹም ከምዚ ይርከብ።
 
ኣታ ብኡ ጥራሕ ይመሰለልኩም በሉና
ኣብ ዘዘሎኹሞ ብጸሎትን ጾምን ሓግዙና።
ኤእ እንተዘይሓወዩ ድማ የሕጽሮ በሉ
ናይ እንዳ ጎብየ ሕማም ነዊሕ’ዩ ሱሩ።
ዓመታት ዝሻደነ ሕሱም ጋንየን
ደምን ጥንቆላን ለሚዱ ከይከውን።

ኣብኡ’ውን ክንፍትን እንተተመሰለልና
እንታይ’ሞ ክንገብር ተካላት ወሊድና።
ብጥዑያቶም ኣይቀሰንና ምስተጸለሉ ኣየዕረፍና
ንመን’ሞ ክንቦም እምኒ ትለድ ኩሉ ወዮ ኮይኑና።
እወ ጨካን ስለ ዝኾነት እምኒ ትለድ ከም ዝብሃል
ንሕና’ውን ኩልና ከነዕርፍ የሕጽሮ ጥራሕ ንበል !!!!!!!