ኣብ መዳጎኒ ስደተኛታት ሆሎት-እስራኤል ብኤርትራውያንን ሱዳናውያንን ስደተኛታት ዝተሰርሐት ቲያትራዊት ደኩመንታርይ ፊልም ኣብ መበል 66 በርሊናለ ኣህጉራዊ ናይ ፊልም ፈስቲቫል ንህዝቢ ንምርኢት ቀሪባ

ዝሓለፈ ቀዳም ዕለት 13 ለካቲት 2016 ሰዓት ሸሞንተ ምሸት ነታ ኣብ እስራኤል ኣብ ቤት ማሕቡስ ሆሎት "ኣብ መንጎ ሓጹር" Between Fences" ዝተሰምየት ብኤርትራውያን፣ ሱዳናውያንን እስራኤላውያንን ስደተኛታት ተሰሪሓ፣ ብእስራኤላውያን ኣፍረይትን ኣለይትን ኣቀናበርትን ፊልም ብጽፉፍ ኣገባብ ንምረት ሂወት ስደተኛታት እስራኤል ብፍላይ ከኣ ንኹነታት ማእሰርቲ ሆሎት እተንጸባርቕ ናይ 85 ደቃይቕ ፊልም ብዓቢ ድምቀት መኽፈቲ ተገይሩላ። ነታ ፊልም ክዕዘቡ ሓያሎ ግዱሳት ብቕንያቱ እዮም መእተዊ ካርድ ዓዲጎም ወዲኦሞ። ኣብ መመረቕታ እታ ፊልም ከኣ ወንበራት እቲ ሲነማ ሙሉእ'ዩ ነይሩ።

እዚ ከምዚ ዝኣመሰለ ስራሕ ኣብ ዓቢ ኣዝዩ ግኑን ዝኾነ ኣህጉራዊ ናይ ፊልም ፈስቲቫል ክቐርብ ንመጀመርያ እዋን ብሙዃኑ ዝድነቕ'ዩ። ብፍላይ ኣብ ጀርመን ንሃገረ እስራኤል ዝነቅፍ ምንቅስቓሳት ርኡይ ብዘይሙዃኑ ነዚ ከምዚ ዝኣመሰለ ንጉድ መንግስቲ እስራኤል ዘቃልዕ ፊልም ኣብ ማእከል በርሊን ንህዝቢ ክቐርብ ዘገርም`ዩ ነይሩ። እታ ፊልም ብቛንቋ እብራይስጥ፣ ትግርኛን ዓረብን ዝቐረበት ኮይና ኣብ ትሕቲኣ ብጽሑፍ መልክዕ'ውን ብቋንቋ እንግሊዝ ዝተተርጎመት እያ። ኣብታ ፊልም ዝስማዕ ሙዚቃ ኸኣ ብውሕሉል ኣገባብን ልስሉስ ኣቀራርባን ከም "ንሰማማዕ ንቑሩብ ጊዜ'ና ኣይኮናን ነበርቲ" ዝብል ናይ ትግርኛ ደርፊን ካልኣ ናይ ቀደም ናይ እስራኤል ደርፍታት ይስማዕ። ኣብታ ፊልም ኤርትራውያን ሕዩራት ሆሎት ብመልክዕ ቲያትር ኣብ ኤርትራ ኣብ ሃገራዊ ባርነት እንከለዉ ዝወርዶም ዝነበረ ጸቕጢን ማእሰርትን ከንጸርቕዎ ይረአ። ገሊኦም ኣብ ናይ ውልቂ ናይ ሓለፍቲ ጥቕሚ ንዝውዕል ብነጻ ኣይንሽቅልን ስለ ዝበሉ ገሊኦም ከኣ ርእይቶ ስለዝሃቡ ከም ዝተኣስሩን ዝትገርፉን በዚ ኸኣ ሃገሮም ገዲፎም ክስደዱ ከምዝመረጹ ብስነጥበባዊ መልክዕ ከንጸባርቕዎ ፈቲኖም። ንጽምእን ጥምየትን ምድረበዳ ተጻዊሮም ኣብ ኣፍደገ እስራኤል ምስ በጽሑ ብእስራኤላውያን ሓለውቲ ዶብ ዝወርድ ግፍዒን  ኣብ ማእከል ተልኣቪቭ ዘሎ ዓሊትነትን'ውን ኣብታ ፊልም ተናኺፎሞ እዮም። 

ተዓዘብቲ ኣብ ዕለተ መኽፈቲ'ታ ፊልም ብዓቢ ልቦናን ተመስጦን እዮም ነታ ደኩመንታርይ ፊልም ተኸታቲሎማ። ድሕሪ ትዕዝብቲ እታ ፊልም፣ ነታ ፊልም ዘዳለዉን ኣብኣ ዝተዋሱኡ እስራኤላውያንን ናብ መድረኽ ብምውጻእ ምስ ህዝቢ ተላልዮም። ዘሕዝን ኣጋጣሚ ኮይኑ ኣብታ ፊልም ዝተሳተፉ ኤርትራውያንን ሱዳናውያንን ካብ እስራኤል ክወጹ ስለዘይከኣሉ ካብ መንግስቲ እስራኤል ፍቓድ ስለዘይረኸቡን ኣብ'ቲ ስርሖም ምስ ህዝቢ ዝተላለሉ ዕለት ክርከቡ ኣይከኣሉን። ኣብ ክንዲ ኩላቶም ግን ኣቕራቢ እታ ፊልም ኣቢ ሞግራቢን ኣልዩ እታ ፊልም ኸምን ብዛዕባ'ታ ዘቕረብዋ ስራሕ ንህዝቢ ብዝርዝር ኣቕሪቦምን ካብ ህዝቢ ሕቶታት መሊሶምን። 

ኣቕራቢ እታ ፊልም ኣቡ ሞግራቢ ብዛዕባ እቶም ኣብ ሆሎት ዘለዉ ስደተኛታት ክዛረብ ሕንቕንቕ ኢሉ ንብዓት ስለዝሰዓሮ ክገልጽ ኣይከኣለን ብፍላይ ኣብቲ ምሸት ኣብቲ ኣደራሽ ተረኺባ ዝነበረት በዓልቲ ቤት ሓንቲ ካብቶም ተዋሳእቲ ኤርትራውያን ምስ ረኣየ ከም ህጻን'ዩ ተነኽኒኹ ነቢዑ። ናብ መድረኽ ጸዊዑ ናብ ህዝቢ ምስ ኣቕረባ ኸኣ ኩሉ ተዓዛቢ ተደፋኒቑ ኣብ ፍሉይ ስምዒት ኣትዩ። ኣብ መወዳእታ ካብ ህዝቢ ምስጋናን ኣድናቖትን ተቐበሉ'ሞ ናይቲ ምሸት መደብ ተዛዘመ። እንተኾነ ድሕሪ'ቲ ፊልም ኣብ ካልእ ቦታ'ውን ንመመረቕታ ኣብ ዝተዳለወ ጽምብል ሓያሎ ዕዱማት ተረኺቦም ክዘናግዑ ኣምስዮም። 

በርሊናለ ኣህጉራዊ ናይ ፊልም ፈስቲቫል ዓመታዊ ኣብ በርሊን ዝካየድ ኣዝዩ ተፈላጥነት ዘለዎ ዓበይቲ ናይ ሆሊ ዉድ ተዋሳእቲ ከይተረፈ ስርሓቶም ዘቕርብሉ መድረኽ'ዩ። እዛ ኣብ እስራኤል ፈርያ ዘላ ኣብ መንጎ ሓጹር ዝተሰምየት ደኩመንታርይ ፊልም ኣብዘን ዝቕጽላ መዓልታት'ውን ንህዝቢ ክትቀርብ'ያ። በርሊናለ ናይ ፊልም ፈስቲቫል ከኣ ክሳብ 21 ለካቲት 2016 ንህዝቢ ክፉት ኮይኑ ክቕኒ እዩ። 

 


Latest

ምስጋና ካብ ስድራቤት ብምኽንያት ዕረፍቲ ኣቦይ ተስፋጊዮርጊስ ብዓታይ

ብምኽንያት ዕረፍቲ ኣዚና እነፍቅሮን እነኽብሮን ኣቦና ኣቦይ ተስፋግዮርጊስ በዓታይ፡  ብኣካል ኣብ ቤትና መጺእኩም፡ ከምኡ’ውን ብዝተፋላለየ መንገዲ ናይ...

Eritrea: ሚኒስተር ፋይናንስ ነበር ኣቶ ብርሃነ ኣብርሀ፡ ሎሚ ንጉሆ ሓይልታት ጸጥታ ጨውዮም ኣበይ ከምዝወሰዱዎ ከምዘይፍለጥን

ሎሚ ኣብ ህዝብታት ኤርትራን ኢትዮጵያን ክቃላሕ ንሰምዖ ዘለና ትርጉም ኣልቦ ናይ ሰላም ስምምዕ፡ ክምቲ ብዙሓት ኢትዮጵያውያን ናይ ሕልና እሱራት ኣብዚ ቀረባ እዋን...

ንደመር ብኣምሓርኛ፡ ንጥፋእ ማለት’ዩ ብትግረ።

Hidden Motives in Every Day Life: The Elephant In the Brain – Kevin Simler Robin Hanson 2018 ትብል...

ካልኣይ ቅሉዕ ደብዳበ ናብ ክቡር ዶክተር አብይ ኣሕመድ፡ ቀዳማይ ሚኒስተር ረፓብሊካዊት መንግስቲ ኢትዮጵያ።

ብዕለት 5 ሰነ 2018፡ ነዚ ብኣኻን በቲ ብመንግስትኻን ናብ ህዝብን መንግስትን ኤርትራ ዝቐረበ ንብይን ኣልጀርስ ብዘይ ገለ ቅድመ ኩነት ተቐቢሉ ከፍጽም...

Eritrea: ፐሮጀክት ዓርቢ ሓርነት - ኣብዚ ሰሙን ካብ ዝበጹሑና ዜናታት:

እቲ ዕሉል ተለኣኣኪ ክፍእ ኮይኑ ኣሽሓት ሰባት ከበሳብስ ዝጸንሔ ወዲ ከበደ (ሓላፊ ቤት ምእሰርቲ ዓዲ ኣቤቶ) ኣብ ትሕቲ ቀይዲ ኣቲዩ። እዚ ብጭካኒኡ ዝልለ ንጽሃት...

Eritrea: ምድማር'ዶ ወይስ ምፍዃስ?

ማንኪ፡ ክቡር ጠቅላይ ሚኒስተር፡ ምሳኹም ክንድመር ንወያነ ኣጥፉኡልና። ዶ/ር ኣብይ፡ ክቡር ማንኪ፡ ጀመርቲ ስለ ዝኾና ገና ምድማር ኢና ዘለና። ንስኹም ግን ቀዲምኩም ኣብ ምፉዃስ (elimination) ኢኹም በጺሕኩም። ግዜ ሃቡና...