![[AIM] Asmarino Independent Media](/images/logo/ailogo.png){kind=logo}
መኸተ ድርዕና፤ ስራሕ ክብርናዶ ኢልኩም፤ ሕጂስ ይኣክል
መኸተ ድርዕና፤ ስራሕ ክብርናዶ ኢልኩም፤ ሕጂስ ይኣክል
መኸተ ድርዕናዶ ኢልኩም ላህመት ሃገር መንእሰያትና እንዳጠፋእኩም
ስራሕ ክብርናዶ ኢልኩም ኣይትሰርሑ ኣይተስርሑ ብኹሉ ተግባራትኩም
ንርኢሎና ብደውና ኣድራዕ ሃገርና ብሰንኪ ዘይብቁዕ ምሕደራኹም
ኣቱም አዝዮም ውሕዳት መንሽሮ ሃገር ኣብታ ገዛኢት ዓንከል ህግደፍ ዘሎኹም
ንንድዬት ንዕንወት ቁጠባ ሃገር ምሉእ ብምሉእ ተሐተትቲ ንስኹም
ወይ ጉድ እንታይ ኢና ንሰምዕ ዘሎና ንህዝቢ ኣደራዕ ጸወታ ንዓኹም
ግደፉባ ጃንዳ ህግደፍ ባጫ ንህዝብና ሃዬንታ ከይኮነኩም
ፍሓስቲ ክፋእ ሃንደስቲ ዕንወት ሕልና ኣልቦ እቲ ልብኹም
ሕጅስ ደሓን ዝበዝሕ ህዝብና ነቒሕሉ እዩ እቲ ሽርሕኩም
ዓገብ ብሃገር ምጥላዕ፤ ብሃገር ምቁማር ሕጅስ ይኣኽለኩም
ብገነታዊ ሕልሚ ምንባር ግደፍዎ ኩሉ ዓለም ንዒቑኩም
ኣርዑትኩም ከቢድዎ ህዝብና ተሳቐዬ ብናይ ጫካ ሕግኹም
ንሰርሕ አሎና ንገብር አሎና እምበር ተዓዊትና ዘይወጻኩም
ክንደይ ጊዜ አሎ ንህዝቢ ምትላል ሕጅስ ይኣኽለኩም
ሓዳስ ሃገርያ፤ ካብ ዜሮ ጀሚርና፤ ተወጺዕና እንዳበልኩም
ዕስራን ክልተን ዓመታት ቀሊል ኣይኮነን ንዘድምዕ ከምዘይከማኹም
እኹል መረዳእታሎ ኣብ ታሪኽ ዓለምና ዘጋልጽ ስንፍናኹም
በላዕ ሳዕሪ ወይ ትሕተሃገረዊ ኣንተዘይኮይኑ መን እዩሞ ክሰምዓኩም
ጅሆ ዝሓዝኩሞ በቲ ሰራም ንሕናን ንሶምን ዝብል ፈላላዪ ሜላኹም
ከበሮ ሓሶት እንዳወቓዕካ ኣይንበርን እዪ ሕፍረትዩ ንዓኹም
ይኣክል ሕጂስ ጎበዝ ተታሊሉ፤ ክኢላ ተባሪሩ፤ ህዝቢ ተማሪሩ
ናይ ኣፍሪቃ ጃንዳ ክሜርሩዠ ፖልፖታዊ ስርዓት ካን ሕሉፍ ዓንዲሩ
እቲ ዓቃል ህዝብና ካብ በለ ሕጂስ መሪሩና ይኣክል ምጻሩ
ሃዬ ኢደይ ኢድካ ንበል ነድሕና ነዛ ሃገር ክትነብረልና ንወትሩ
ይሕተት ኣሎ ኩሉ ኤሪትራዊ ኣርሒቑ ዝሓስብ ነታ ሓላል ሃገሩ
ዓለምና ትሐምበብያ ዘላ ከይንኸውን ጊልያ ኣብ ዓደቡኡ ዝነብር ሓሲሩ
ጸጋ ሃገሩ ብላዕለዋይ ኢድ ዘይወነነ ዜጋ ይነብር ኣብ ገዛእ ሃገር ተሸቚሪሩ
ሳላ ህግደፍ ኣዬጥርን ኣሎ ክእለትን ሃብትን ዝገብሮ ዘድምዕ ተዋዳዳሩ
ምስቲ ወጻእተኛ ናብ ሃገር ዝመጽእ ክነብር ብሉጽ ሃብቱን ክእለቱን ኣዋፊሩ
እቲ ዝጽበዮ ዕጫ ፍሉጥ ንኽተስምዖውን ዘሰቅቕ ንኹሉ ፈታዊ ሃገሩ
ንሕሰበሉድኣ ንቃለስ እዚ እዩ ክኽውን እቲ ዕድልና ንኹልንና ንሓዋሩ
ሕማቕ ሓድጊ የንጾላሉሎ ንጸላኢኻኳ ዘይትትምነዬሉ ርእስኻ ዘድንን ንወትሩ
ኔው ንበሎ ነዚ ዝገዝእ ዘሎ አደንቊሩ ኣጥምዩ፤ ቀቲሉ፤ ኣሲሩ
እወ ከይንርዕሞ እዚ ሕማቕ ውርሻዊ ተርእዮ ነብጻሓዮድኣ ናብ መፈጸምታ ዕምሩ
ህዝብና ክነብር ብሰላም ብራህዋ ከምዓለሙ ተኸቢሩ ተሓቢኑ ተሓፊሩ
ኣወ ኤሪትራና ትሓተናላ ከነውጽኣ ካብ ምንጋጋ ሕሱማት ኣራዊት
ባርባራዊያን ጨካናት ዝነብሩ ብናይ ማእከላይ ዘመን ሕገ ግዝኣት
ንቐልጥፍ ነልግሶም ንኤሪትራና ብኹሉ ሓይልና ከኖሰጉማ ንቕድሚት
ቁርዲድ እዮም ኣባይ ናይ ድሕረትን ድንቁርናን መሃንድሳት
ብትሪ ንግጠሞም ኤሪትራና ወሊዳ ደይኮነትን ጀጋኑ ሓዬታት
ነልግሶም ድኣ ተኸፊሉዋ እዩ ሃገርና ደም ጀጋኑ ምዑታት ፈላጣት
ዕድል ኣይንሃቦም ወሰንድኣ ነትሕዞም ነዞም ሕሱማት ተንኮለኛታት
ንኣርባዓ ዓመት ዝተጨማለቑ ከዳዓት ብፈላሊኻ ግዛእ ሽርሕታት
ህላዌ ሰናይ (Ph.D.)
