![[AIM] Asmarino Independent Media](/images/logo/ailogo.png){kind=logo}
ኮቦሮ መስከረም!
ኮቦሮ መስከረም!
ኣሰር’ቲ ውሕሉል ጥበብ
ናይ ወለ’ዝጊ ክእለት
ብመራሕ ዕለት ዘመን ንኽሕደስ
ወገግ ትብል’ሞ መስከረም፡
ብኽልቲኡ ሸነኽ ሩባ መረብ
ሽግ ተወሊዑ ዓዲ’ኹለል።
ህዝቢ ተኣኪቡ
ይልከ’ሞ ሓሙኹሽቲ ጸበል
ዝሓለፈ ሕሰምና፡ ዝመጽእ ድማዕና፡ ግበረልና
እናበለ’ምህለል፡ ይምነ ሰናይ ዘመን።
ወፋሮ ኣትዮም፡ ወርሒ ምስ ደመቐት
መጥቅዕ ምስተወቕዐ ምህልላ ምሰ’ብቅዐ
ዑፉን ተጠቢሱ ገዓት ምስተበልዐ፡
ዓቢ ንኡስ ናብ ቅርዓት ይወጽእ
ተኣኪቡ’ስሕቕ
ነዳዲ’ነጥር፡ ሓዊ’ስሕን።
ይጻወት-ይስዕስዕ ከበሮ’ድስሕቕ።
መንእሰያት ይምርሹ፡ ይወርዱ ሩባ
በ’ገባብ ይቃለሱ ኣብ’ቲ ሑጻ-ሑጻ
ጎራዙት ይቑነና፡ ይስለማ ሕዮባ።
ከበሮ ጓይላና፡ መሞቒት ዕላልና
ከም’ዛ ንፋስ ቁሪ፡ ቅዝሕዝሕ ናይ ጥሪ
ቀስቃሲት ወንና፡ ዓጃቢት ወግዕና
ምስ’ቲ ልሙድ ዕሊ መውስቦ ብፍቕሪ
ባህግን ባህልን ኣድሚቓ፡ ንእዋን ተዛኒ።
ከበሮ ጓይላና፡ ሪም ዓደቦ’ና
ንቑጽ ቆርበት ዝሽንሽና፡ ቅዳድ ገረወይና
ብጸልማት ብለይቲ፡ ክሳብ ዝነቓነቑ’ጋንንቲ
ትንቊ ነበረት ቀደም፡ ትኹሕኩሕ ኣባይቲ።
እንተ ሎሚ-ሎሚ
ገው-ቀነው እናበለ መጥቅዕ
ትፍክር ተጉርዕ
ሂ….ም ቢ…ም ትብል ከም መድፍዕ፡
ዕጣን-ዕጣን ገዲፋ፡ ባሩድ-ባሩድ ክትጨኒ
መስከረም ምድሪ
ሩባ መረብ ምስጋር ኣጊሙዋስ፡
ፈቐዶ ስግር ባሕሪ ተዕነኒ።
ከም’ዛ ዋዛ፡ ሓቂ ከተምስል
ትጭርሕ፡ ተስምዕ መቓልሕ
ኣብ ርሑቕ ኣብ ስደት መሬት ከተውግሕ
ንሰባ ገዲፋ ምስ ደቂ-ሕድርትና ከምትመክር
ጎቦ-ጎቦ ትነብሕ።
ሓዳስ ከበሮና
እንዳ ዝናን ባህታን
ጸሓይ ጸልዮም ዝሃቡና
ከይተፈለጠና
ዘስከረቶ’ያ ትመስል ሰዋስው ትግሪኛና።
ከመይ’ሲ ስጋን ነብስ ክንፈቅድ
ትንፋስ ክንዲ ትህበና
ምሒር ክትዓብድ
ደዋዊሳቶ መልክዕና።
ከም ስርኤል-ቀትሪ ተጎኒፋ
ጽፍዒት ተወሊፋ
ኣብ ስደትን ኮለልን ትጀሃር
ቀቅድመና ሓሊፋ።
ከም ቀደማ፡ ከም’ቲ ናይ ፈለማ
ኣብ ደስታን ፍስሃን ክንዲ ተጻውተና፡
ኣብ ውሽጥን ወጻእን ተጸልለና!
ክትዕ ጸማማት ክሳብ ዝመስል ባይቶና
ናብ ሓዳስ ባቢሎን ከምዝለገበት ምሕዳርና።
እሞ ደጊም ይኣኽለኪ ክንብላ
እዋኑ ክሳብ ዝኣክል ንጓይላ
ኣብ ቀጽቀጽ ክንሰቕላ፡
ሩባ መረብ ወሲዱ ቆርበታ ኣርሒሱ
ሆየ ሆየ እናበለ ሽግ ኣናኺሱ
ጸበል ሓሙኽሽቲ ነስኒሱ፡ ዓኾዃይ ዝብለላ
ምስ’ዛ ሓዳስ ዓመት፡ ሓዳስ ዙርያ ምስ ነጻላ
ዘብጽሓላ፡ ወዲላማ’ፍጠረላ።
ከመይ’ሲ እዛ ዓለም ዕዳጋ
ናይ ለውጢ መድረኽ ስለዝኾነት እንዳኣላ
መስከረም-መስከረም ከበሮ ጥራይ ዘይኮነስ
ምህልላ ብመጥቅዕ ዝእወጀላ።
ቡሩኽ ሓዲሽ ዓመት ይግበረልና
ክሳብ ንዓመታ ዛ’እዋን ብሰላም ብፍቕሪ
ብጀኦግራፍን ደሞግራፍን ዘይፈላሊ፡
ምስ ዳመራ መስቀል
ሑጻ-ሑጻ መረብ
ሆየ! ና’በልና፡ ክንስሕቕ ክንቃለስ
እዋን ክምለስ ይንጸገልና ጸበል።
ዳንኤል ተስፋዮውሃንስ ተኽለጊዮርጊስ 09/27/2015
