ዝሓለፈ ኩሉ ካብ ግዝኣት ቱርኪ

ዘስሕቕ ዘይብሉ እንትርፎ ዘብኪ

መሪር ኢዩ ኔሩ ናይ ገዛእቲ ምልኪ

መስዋእቲ ከፊልና እቲ ስቓይ ንኽንኪ

ካልእ ካኣ መጺኡ ዘይተሓስበ ምልኪ

ቃልስና ኮይኑ ተሪፉ ቁጽርና ዝንኪ

ዝነበረና ክብረትውን ዝንኪ

ኣስዒቡውን ዝሓሰመ ምልኪ

ዝሓለፈ ይኣክል ካልእ ከይነብኪ

ንፁ ሕጊ ንግበር ከይድገም ምልኪ

ዝስፅብ ወለዶ ዳግም ከይበኪ

እዚስ ኮይኑ ረኺብናዮ ዘጋልጽ ንሕንኪ

ኣቦ ኣይድሓነ ኣደ ኣይድሓንኪ

ሰላም ሲኢንኪዮስ ወላድ መኻን ኴንኪ

ኣለኺውን ካብ ብዙሓት ሓደ ዝስኣንኪ

ናይ ሕጂ ገደደ ቀባሪ ዘይብልኪ

ስለ ዝተሰዱ ደቂ ሓውትኺ ደቂ ሓውኪ

ዓዲ ሰብ የብሉን ዘልቅሰልኪ

ጸንቅቒ ንብዓትኪ ንኹሉ ፈሊጥኪ

እቶም ንዛረብ እቶም ንቕንዘወልኪ

ኣለውና ጨካናት ሓንኮልቲ

ዘይደልዩ ንብዓትኪ ክንኪ

ከይሓነኹ ዝድግፉ ምልኪ

እናዓንቀፉና ብቑልጡፍ ከይንረድኣኪ

ጸልይልና ጥራይ ኣብ ዝኸድኪ ኬድኪ

እስከ ስምፅኒ ናብ ኣቦይ ክሓልፍ

ከይዛረብ የብልዎ ኩልፍ

ከም ድላዩ እኳ ከይልፍልፍ

ናይ ልቡ ኣውጺኡ ከይሓልፍ

ኣብ ዘዝኸዶ ይኾንዎ መኻልፍ

ንደቁ ዘሚቶም ሊኢኹ ከይዓርፍ

ኒሑ ተጸንቂቑ ይብል ኩልፍ ክልፍ

ሕርቃን ስለ ዘለዎ ዘይሓልፍ

ብልቡ ይምህለል እቲ ስቓይ ክሓልፍ

ቃላት ከይሰትኮ ግልጽ ንዝሓልፍ

ኳረንቲ ከየእትውሉ መላፋልፍ

በቲ ጭካኔኦም ትንፋስ ከይትሓልፍ

ፈጣሪ ክሳፅ ዝወስዳ እቲ ዘይሓልፍ

ኣምላኽ ጥራይ የርእየና እዚ ኩሉ ክሓልፍ

ጽልኢ ተሪፉ ክህሉ እቲ ፍቕሪ

ፈጺሙ ክሕጎስ ስውኣት ዘካሪ

ክምፅብል ክሓስብ እቲ ኩሉ ወፋሪ

ሰላም ክሰፍና ናይ ኤረና ምድሪ

ፈጺሙ ክቐስን እቲ ኣብኣ ነባሪ

ህዝብና ከመስግን ንልዑል ፈጣሪ

ክብርን ዝኽርን ንስውኣትና

ዓወት ድማ ነቲ ደም ዝነብፅ ዘሎ ህዝብና