ኣስመራ ኸተማ

ናይ ቀደም ስማ ኣፍሪቃዊት ሮማ

ርእሺ ኹለን ትርከብ ኣብ ዝባን ጎቦ ተኾዲማ

ዘይተድክም ተኾሊላ ዘይትምኖ ተሳዒማ

ብጽርየትን ብስርዓትን ንኹላተን ቀዲማ

ጸሓይ ንግሆ’ምሲሎም ሸሊሞማ

እቶም ጻዕዳ ገጾም ደቂ ሮማ

ኣስመራ ኸተማ።

ኣነ ዝደሊ!

ካብ በለዛ መብራህቲ

ኣበ’ባሻውል ቡቁልቲ ምስ ሞኽባዕቲ

ናይ ካራቨል ስፓጌቲ ናይ’ንዳ ስድስቱ  ኮተለቲ

ናይ ሳንታ ፋሚልያ ትምህርቲ ናይ ቤት ገርግሽ ኣትክልቲ

ብቦጥ ብኻሮሳ ጽሩይ ማይ ክሰቲ  ዘይብሉ ዓለቕቲ

ናበይ ከይዱ ናይ ቀደም ኣስመራ ጽብቕቲ

ድምጽኺ ይሰማዕ ኣንቲ ለምለም ሰቲ

ኣብ ናይ ለውጢ ዓውዲ

ዘሰስን ምህርቲ።

ኣነ ዝናፍቕ!

ናይ ካተድራለ ናታለ

ብፕያኖን ደወልን ዝዓመረ

ናይ እንዳ ጎላ ሓኸለ ናይ ገዛ ብርሃኑ ብርለ

ናይ ደናዳይ ኮሞደረ ናይ እንዳ ኣልፋ ፓነ-ቶነ

እንዳ ኣለም መሓረና ደስታ-ካራሜለ

ኣስመራ ወሓለ ንኣኺ ዝኣመነ

ናበይ ከምዘበለ

ኣለኪዶ ወረ።

ኣነ ዝዝክር

ናይ ሕጻናት ኮከደ

ናይ ጎራዙት ጭንጭራ ዓበደ

ሽሕ’ኳ እግረይ ኣርሒቑ እንተኸደ

ቅርዓትኪ’የ ለሚደ ኣይቀሰንኩን ተሰዲደ

ወላ ጁባይ መሊኡ እንተኸበደ

ኣስመራ ክብል’የ’ኮ ዓቢደ

ምስተሳእነ ግደ።

ብባጽዕዶ ክጅምር

እንዳ ገርግሽ ክስዕም

እንዳ ሸኽ ዥሚል ክሰግድ

ንፍቕሪ ኣሚነ ክመስል ክዝምድ

ከትክኸሎም ዕጣን ክውልዓሎም ዑድ

ሰማይ ዝዓርግ መናፍስቲ ዘዕግብ

ኣድባራት ቢዘን ዘውርድ።

ብጎዳየፍዶ’ሕሸኒ

ቀልጢፉ እንተሰለጠኒ!

ንሳንታ ኣንቶንዮ ጥቓ እንዳ ባራቶሎ

ናይ ኣሞረ መድሃኒት ኣጥመኒ ክብሎ።

ኣብ ሲነማ ኢምፐሮ እንታይ ከምዘሎ

ጸወታ ረጋቢት ከም ቀደሙ እንተ’ሎ

ኣስመራ’የ ወይኖ ደሃይ እንታያ’ሎ

አረ ምስመን’የ ዝመኽሮ

ሓርቢቱኒ’ሎ።

ላዕላይ ድዩ ታሕታይ

ካበየናይ’ዩ ዝምረጽ ኣየናይ

ክመክርዶ ምስ ኣረጋዊ ኩሕላይ

ዕሉል ባሕታዊ ምስ ተመን መንደላይ

ወዲ ማይ ተመናይ ዝመስል ኣምበላይ

እንተ ዝብለኒ ሕራይ ምጾሞቕኩሉ ጽራይ

ምገበርኩሉ ውራይ ኣውዲቐ ብዕራይ

ከቃጥበኒ ጓል ዕዳጋ ሓሙስ ጸሓይ

ከብልዓኒ ናይ ዓዲ ስሄል ስርናይ

ኣስመራ ደምሃይ።

ኣነ ዝምነ

እንከለኹ ክበልዕ

እንተሞትኩ ክጸድቕ

መጋርያይ ከማሙቕ

ምስ ደቀይ ክውዕል

ምስ ወለደይ ክስሕቕ

ተማሂረ ክፈልጥ።

ኣነ ዝጸልእ

መኣዱ በሊዑ ስንቂ ደቁ ዝሰርቕ

ጠበንጃ ዓጢቑ ንግድን ዕዳጋን ዝስርንቕ-ዝሓንቕ

መንቀሳቐሲ ወረቐት እንዳበለ ልቢ ሰብ ዘድርቕ

ኣብ ኮምቢሽታቶ ዓሪዱ ነጋሪት ኲናት ዝድስቕ

ብሃውን ብመድፍዕ ፐላሶታት ዘውድቕ

ንሱ’ዩ ዘገርም ዘጨንቕ።

እንተዘይተደናጊረ

ክፍትንዶ ምስ እዋን ተመሳሲለ

ዝገበርኩ ጌረ መንቀሳቐሲ ወረቐት ረኺበ

ክኣቱ ነ’ስመራ ብመንደፈራ’ቢለ በዘቕዘቕ ተሳፊረ

ሰበረ ቆጺረ ንኺዳነምህረት ሰምበል ሞባአይ ኣንቢረ

ማ’ጨሎት ጋብር ደርዓንቶ ነ’ስቢዳለ ኣቐቢለ

ብቲራቨሎ ክሓልፍ ካሮሳ ሰሪረ።

ወይስ ክጅምርዶ ብደቀምሓረ

ባኮ ቢሽኮቲ ናይ እንዳ’ባሓበሽ ኣንጠልጢለ

ሾመንተ ታዕሪፋ ከፊለ ኣውቶቡስ እንዳ ሳልባቲ ተሳፊረ

ናይ ተመሃራይ ሰድያ ተዓዲለ ከም’ቶም ሙሉእ ዝኸፈሉ ከቢረ

ኣቤት ክጥዕም ዝነበረ ሽታ ጽርግያ ናይ ደቀምሓረ

ብእቶን ፋብሪካ-ቢሽኮቲ ዝተዓጥነ።

ተሃዊኸ’ለኹ ኣነ

ክበጽሕ ከተደራለ ደወል ከይተደወለ

ክሕውሳ እዛ ቢሽኾቲ ናይ ደቀምሓረ

ምስ’ቲ ሽሻይ ናይ ናታለ።

ክኣቱ እንዳ ባደረ

ቦኖ ፌስታ ከይተባህለ

ሕውስ ክብል ጸሓይ ከይመረረ

ከርክበሉ ነቲ ሰሓቕ ናይ ጎምበለ ታሕጓስ ናይ ወሓለ

ንቡር ክረክብ ዓውደ ዓመት ዝዘከረ።

መንእሰይ

ብጥይትን ብዱላን ከይተሃድነ

ብዛዕባ ቺናማን ኣሞረን እንዳዕለለ

እንተ ዝርኢ ፒኮሎ ዝቐሰነ

ጀዙ ባምቢኖ እንታይ ምበለ

ኣበ’ስመራኸ ክንደይ ዕልል ምተባህለ

የውግሓዮ ብገለ።

Daniel T Teclegiorgis (

12-24-2011

This email address is being protected from spambots. You need JavaScript enabled to view it.