ብልሒ ቆጺርካየን ንሽርሕን ትምክሕትን

ቡዙሕ ትደኽመለን ብቐትርን ብለይትን

ነዊሕ ሰሪሕካለን ኣብ ጫካን ባዓትን

ናይ ሎሚ ዓለም ግን ትማል ኣይኮነትን

ዓዲ ምስ ኣተኻስ ማዓስ ገዲፍካየን

ከም መባልዕትኻ ግዲ ቆጺርካየን

ሃገር ኣድሚኻያ ኣዴታት ራኣየን

ኣንታ ገበነኛ ሕጊ ኣልቦ ጠላም

ድሌትካ ትፍጽም ኣብ ብርሃን ኣብ ጸላም

ሙዃን ግን ኣብዩካ ኮምኡ ኢያ ዓለም

ማዕቀብ ምስ ከረረ ህዝቢ ህዝቢ ምባል

ወሪዱዎ ህዝቢ ኣይናቱን’ዩ ጉዳይ

ማዕቀብ ንዓኻ’ዩ ጻሕታር ነገር ጠንቃም

መልሓስካ ኣይእሩም ኣእዳውካ ውን ኮምኡ

ንሃገር ረሚስካ ሓሊፍካ ኪኑኡ

ንጎረባብቲ ድቃስ ከሊእካዮም

ኣጠንቂቖሙኻ ብሓባር ዘትዮም

ቀጺልካዮ ግና ተግባር ናይ ዓዋሉ

ቀዛፊ ውን እኮ ኮምኡ ኢዩ ጌሩ

ኣበይ ከይተርፈካ ውዒሉ ሓዲሩ

ክሳብ ማዓስ ህዝቢ ክኸውን ኣደዳ

ዓቢ ምስ ንእሽቶ ኩላ ተሰዲዳ

ኣብ ሳሃራ ሲናይ ኩሊት ተዘሚታ

ብሰንክኻ ኢያ ህዝቢ ተዋሪዳ

ኩሉ ግዜ’ለዎ ዝብልዎ ለባማት

ዘብቀዐ ይመስል ዕድመ ናይ ጠላማት

ሃገር ክወግሓላ ካብ ዘላቶ ጸልማት

ብቕዋም ክንምራሕ ክቕንጠጥ መከራ

ብናይ ሓባር ራእይ ክንሃንጻ ኤርትራ

ሳልሕ ዓብደላ

ካብ ለምለም ካናዳ

ዕለት 15-12-2011

HIYABU@NETZERO.COM