ስውእቲ 

በጃ ሃገር - በጃ ክብረት በጃ ባሕሪ - በጃ መሬት
በጃ ሓድነት - በጃ ሰላም በጃ ዕብየት - በጃ ዲሞክራሲ
በጃ ልዑላውነት - በጃ ህዝቢ - በጃ መሰል - በጃ ሕጊ
 
ካብ ብጠጠውካ ሞት - መሪጽኪ መስዋእቲ
ሓንሳብ ንሓዋሩ - ከተብርሲ መግዛእቲ
ኣየ ትብዓት - ኣብ ጎኒ ሓውኺ
 
ሓቦ ጅግንነት - ዓለም ኣዛሪብኪ
ዝመጽእ ወለዶ - ቀሲኑ ክሓድር
ስክፍታ ዘይብሉ - ዓዱ ከመሓድር
 
ብልጽቲ ህይወትኪ - ኢልክያ ጆባእ
ኣብ ሓዊ ኣቲኺ - ከተጥፍኢ እሳት
ህዝቢ ክመሓደር - ብሕጊ ብስርዓት
 
ሕድሪ ገዲፍኪ - ንዝስዕቡ ብጾት
ሽግና በሪሃ - ከይትጠፍእ መታን
ውዕለትኪ ከቢድ’ዩ - ከመይ’ሉ ክኽፈል
 
ዘይትምለስ ትንፋስ - ብንዋቲ ናይ ዓለም
ከም ናትኪ ትብዓት - ይሃቦም ህሉዋት
ዕላማኺ ከፈጽሙ - ከተዕርፊ ቀሲንኪ
ዘልኣለማዊ ክብሪ - ንዓኺ ስውእቲ
ህያው ገድልኺ - ሓወልቲ’ዩ ነባሪ

*****************************

ስዉእ 

ሙዉቕ ዓራትካ - እንጀራ ኣዴኻ
ንድሕሪት ገዲፍካ - ከተድሕን ሃገርካ
ውሽጥኻ ሕሩር - ገጽካ ፍሽኽታ
ናይ ግድን ኮይንካ - መግዛእቲ ፈንፊንካ

ኩሉ ጠንጢንካ - ምቾት ናይ ከተማ
ምስጢርካ ዓቂብካ - ብግቡእ ከይተፋነኻ
በሊሕ ኣእምሮኻ - እቲ ብሩህ ተስፋኻ
ብትምህርቲ ብልጫ - ልዕሊ መሳቱኻ

ናፍቖት ስድራኻ - ኣብ መዓሙቕ ልብኻ
እታ እንኮ ህይወትካ - ንሃገርካ ኣወፊኻ
ንሙሉእ ናጽነት - ናይ ሓባር ዕላማ
ትንፋስካ ኣረኪብካ - ኣብሪህካያ ሽግና

ካብ ቀዳሞት ሕድሪ - ናይ ጽንዓት ለበዋ
ንዳሕረዎት ኣብነት - ይኹኖም  ኣርኣያ
ዝተረፉ ይግበሮም - ዓቀብቲ ሕድርኻ

ስስዐ ንዋቲ - ረብሓ ናይ ውልቂ
ምፍልላይ ወጊድ  - ተረከብቲ ሕድሪ
ዘየዕብሩ ቃልካ - ነዕጽምትኻ ክብሪ

********************************