ብቐይሕ ደምኩም ታሪኽ ዝጻሓፍኩም
 ከምሎሚ ዘይኮነ ከይማሰነ ሰውነትኩም
                  ኣብ’ዚ ዘለኹሞ ሎሚ ሂወት ከይወደቕኩም
                  ዝርሳዕ ኣይኮነን’ዚቕዱስ ስራሕኩም                                                                
                         ዝርኣየ ይንገር ዝዋዓለ ይቕበር ተባሂሉ
                         ከም’ዚ ሎሚ ኣይነበረን ኣካላትኩም ጎዲሉ
                         ንኻላሽን-ብሬን ኣብ ዝባንኩም ተሓዚሉ
                         ኣብ ጋሽ-ባርካ ውዒልኩም ኣብ ከበሳ ትሓድሩ
                         ኣብ ሳሓል ቆሪስኩም ኣብ ደንከል ትድረሩ
                  እወ’ንሕማቕ ከም ጽቡቕ ወሲድኩም
                  ንጥሜተ ዕርቃን ከም ውሁብ ቆጺርኩም
                  ንዓቐበተ-ቁልቁል ከም ጎልጎል ዘሊልኩም
                  ንርሑቕ ከም ቀረባ ኣቐሚጥኩም
                  ኩሉ ከም ዝካኣል ንነብስኹም ዘዕገብኩም
                  መን ድዩ ዘይንስኻትኩም ባዕልኻትን ባዕልኻትም

                         ኣንታ’ወ ውጉእ ናይ ሓርነት
                         ኣይበቕዖን’የ ክገልጾ ነቲ ናትካ ተረት
                         ቃላት ይሓጽሩኒ ናይ ብኡነት
                         ዝተኸፍለ ዋጋ ንሓድነት ንነጻነት
                         ሃገርካ ንምልቓቕ ካብ ባዕዳዊ መግዛእትነት
                         ህዝብኻ ከስተማቕር ላዛ ናይ ሓርነት
                         ኣካላትካ ዘጉደልካ መዘና መስዋእትነት

                  መንድ’ዩ ንጸላም ከም ብርሃን ጋሊሁ
                  ንለይቲ ከም ቀትሪ ኣብሪሁ
                  ዓወት ወይ ሞት ኔራ ጭርሕኡ
                  ሓድነትና መንገዲ ዓወትና ኔሩ መቓልሑ
                  ኩሎም ወረራታት ክሳብ ዘስካሕኩሑ
                  ዘይንስኻ’ሞ መን ኔሩ ዝሳዓረ ንዝተመክሑ
                         ኣይንሓደን’የ ንኹሉኹም
                         ሰ.ሓርነት ዶ ህ.ሰራዊት ክብለኩም
                         ኩሉኹም ጀጋኑ ደምኩም ዝሓወስኩም
                         ንነጻነት እፎይታ ኣካልኩም ዝሳኣንኩም
                         ደቂ ሓንቲ ማህጸን ከመይ ክፈልየኩም
                         ንሓደ ዕላማ ኣካልኩም ዝጎደልኩም

                 ኣብ ክንዲ ኣዕንትኹም ዝዓወርኩም----ንዕርዲ ጸላኢ ዝሰበርኩም
                 ኣብ ክንዲ ኣእዛንኩም ዝጸመምኩም----ንምእንቲ ህዝቢ ዝሓመምኩም
                 ኣብ ክንዲ ደምኩም  ዘፍሰስኩም ------ናይ ነጻነት ዋልታ ዘውሓስኩም
                 ኣብ ክንዲ ምምሃር ምግዳል ዝመረጽኩም--- ንሰላም ንራህዋ ዋጋ ዝኸፈልኩም
                 ንስኻትኩም ዶታ እዚ ንረኸብኩም-------መን ይሓልሞ ብዘዕበኹሞ ከልቢ ምንኻስኩም
            
             ሕልምኹም’ሲ፡- ዝተሰደ ዓዱ ተመሊሱ
                          ዘሎ ኣብ ገዛ ብሂወቱ ብነብሱ
                          ኣብ ቃልሲ በጃ ህዝቦም ንዝለመሱ
                          ታሪኽ ናይ ስውኣት ንኸንግሱ
                          ክጻሓፍ ክዝንቶ’ዩ ኔሩ ዘተስፉ
                          ሕልሚ ናይ ኩሉኹም ኔሩ -ሕልሞም ዳኣ ይህሰሱ
          
          ኣየ’ወ፡- እቶም ዝሓለፋ እንተዝምለሱ
                እቶም ዝሰንከሉ እንተዝፍወሱ
                እቶም ዝበደሉ እንተዝጣዓሱ
                እቶም ዝተበደሉ እንተዝኻሓሱ
                ኣርሒቖም ዝገሹ እንተዝምለሱ
                ዝፈረሱ ዑና እንተዝሕደሱ
                ኩሉም ሓቢሩም ኢዶም እንተዝሕውሱ
                ምህርቲ ነጻነትና ንተሓፍሱ
                እቲኦም ኣይምተኸሱ እዚኦም ኣምኸሰሱ
                ኩሎም ሓቢሮም ምተቓደሱ
                ውጋኣት ሓርነት ካኣ ኣኽሊሎም ምለበሱ
                        ዝናኣድ ተግሶ’ዩ ንሰምዖ ዘለና
                        ንኹሉ ጽዋዒት’ዩ ንባዓል ሕልና
                        ሃየ ሓቦ ንበል ርእስና ኣቕኒዕና
                        ንሓግዞም ንጽጉማት ወገና።
        ውጋኣት-ሓርነት ሰንድ ሃገርና ኢኹም”