ኣስማት ናይቶም ነፋሪት ሓይሊ ኣየር ኤርትራ ሒዞም ስዑድያ ዑቕባ ዝሓተቱ ፓይለታት ተፈሊጡ።

ምንጭታት ወጋሕታ ሳሊና ኣብ ዝሰደዱልና ሓበሬታ ድሕሪ ሓደጋ ላምፔዱዛ “ጥልመት ህግደፍ ይኣክል” ንዝብል ጠለብ ህዝብና ተቐቢሎም ኣውሮፕላን ሒዞም ናብ ስዑዲ ዓረብያ ዑቕባ ሓቲቶም ዘለዉ ኣብረርቲ ሓይሊ ኣየር ኤርትራ ሜጀር ኢሳይያስ ብርሃነ ካፒተይን ኣሮን ታደሰ ዝብሃሉ ሙኩራት ኣብረርትን ስሙ ዘይጠለለ 3ይ በዓል ሞያ ካርቶግራፊን ከምዝኾኑ ኣረጋጊጾሙልና ኣለዉ።

እዞም ሙኩራት መኮንናት ሒዞማ ዝኸዱ ሄሊኮፕተር ዘይኮነትስ ካብኣ ዕብይ ትብል ነፋሪት ድማ ኣብ ዓመተ 2010 ካብ ኤውሮጳ ዝተዓደገት ኮይና ዓይነታ ድማ  E3 AAJ TILATUS 6 CARTO GRAPHY ፒች ዝዓይነታ ከምዝኾነት እቲ ዝተለኣኸልና ሓበሬታ የነጽር።

ብዛዕባ ኣካይዳ ናይዞም ሙኩራት ኣብረርቲ ብዙሕ ዘይነጸረ ነገር ዘሎ ኮይኑ መንግስቲ ስዑዲ ዓረብያ ንምንታይ F-16 ብዝዓይነታ ነፋሪት ዓጂቡ ከምዘውረዶም ድማ ምኽንያቱ ኣየጥለልናዮን።

እታ ነፋሪት ስራሕታ ንወተሃደራዊ ዕዮታት ዝዓለመ’ኳ ተነበረ ከም ወርቂ ቢሻን ካልኦት ሚስጢራውያን መሳርሕታትን ናውትን እውን ተጓዓዕዝ ምንባራ’ውን ምግላጽና ይዝከር።