ኣብ ሃገርና ኣጋጢሙ ዘሎ ሕጽረት ኣገልግሎት ኤሌክትሪክ

ኣብ ሃገርና ኣጋጢሙ ዘሎ ሕጽረት ኣገልግሎት ኤሌክትሪክ ዝተፈላለየ ዓይነት ፍርያት ካብ ዕዳጋ ክጠፍእ ይገብር ኣሎ።

 

ኣብ ውሽጢ ዘለው ምንጭታት ወጋሕታ ኣብ ዝሰደዱልና ሓበሬታ ኣብ ኣስመራ ብጀካ ገለገለ ናይ መገዲ ፓሎታት ዳርጋ ኣብ መላእ እታ ከተማ ተከሲቱ ንዘሎ ጸላም ጠንቂ ኮይኑ ዘሎ ሕጽረት ኣገልግሎት ኤሌክትሪክ ዝተፈላለየ ዓይነት ፍርያት ካብ ዕዳጋ ክጠፍእ ብምግባር ‘ውን ሳዕቤን ክፈጠር ከምዝጀመረ ኣረጋጊጾሙልና’ለው።

 

ከም ውጽኢት ናይቲ ሕጽረት ኣገልግሎት ኤሌክትሪክ ቀረብ ዓይነታት ልስሉስ መስተ ብጀካ ኣብ ውሑዳት ዓበይቲ ሆቴላት ካብ ባራት ጠቅሊሉ ጠፊኡ ከምዘሎ ከኣ እቲ ሓበሬታ ብኣብነት ይገልጽ።

 

መርዓ ዝገብሩ ዜጋታት ከኣ ዝተወሰነ ልስሉስ መስተ ንምርካብ  ካብ ኣመሓደርቲ ከባቢ ወረቀት ኣጽሒፎም ናብቲ ፋብሪካ ክኸዱ ይግደዱ’ለው።

 

ብጀካ’ዚ ኣብ ፋብሪካ ዝፈሪ ዕሹግ  ማይ ‘ውን ካብ ዕዳጋ ዝጠፍአ ኮይኑ እቲ ሕጽረት ኣገልግሎት ኤሌክትሪክ ኣብ ኣስመራ ማይ ቡንባ’ውን ንልዕሊ 2 ሳምንቲ ክቋረጽ ብምግባሩ ዜጋታት ጽሬቱ ዘይሓለወ ናይ ጉድጓድ ማይ ክጥቀሙ ተገዲዶም ከምዘለው ተጠቂሱ’ሎ።

 

እቲ ሕጽረት ኣገልግሎት ኤሌክትሪክ ብቀጥታን ብተዘዋዋሪን ጸገም ዝፈጠረሉ ህዝብና እቲ ጠላም ጉጅለ ብዛዕባ’ቲ ጸገም ጥሉል ሓበሬታ ክህብ ዘይምድፋሩ ተደሚሩዎ ኣብ ሻቅሎት ከምዘሎ መረረቱ የስምዕ ምህላውን ከኣ ሓበሬታ ምንጭታት ወጋሕታ ብተወሳኺ ኣመልኪቱ’ሎ።

 

                             -------------------------------------------//////------------------------------------