![[AIM] Asmarino Independent Media](/images/logo/ailogo.png){kind=logo}
ናቕፋ!
ናቕፋ!
ናቕፋ ዓባይ ደብሪ
ቅሚጦ ናይ ጽንዓት ናይ ሕልምታት ኩምሪ
ምስጢራዊት ፈትሊ ናይ ተስፋ መጥመሪ።
መሬት ኣብ ም’ጋሓ
ብሰልሚ ዋላኻ መረብ ድያ ሰጊኣ
ወይስ ብገዓት መሸላ ሑመራ ተመኪሓ?
ሰሜን ካበ’ስመራ ደቡብ ካብ ቃሮራ
ስግር ባሕሪ ዓደን፡ ማዕረ ወደብ ዓሰብ
ኣጻድፍን ጎቦታትን ተሓጺራ
ንሰማይ ከተንቃዕርር፡ ኣብ ጠረር ተሰቒላ?
ምስ አደን ዶብ ከምትጥርር
ደረት ወርሒ ክትጽሕትር
ኣብ ዝሓለፈ ሕድር ውዕል
ብመኣዲ ተስፋ ዝሓረመቶ ሸውሃት ከይኣኽላ፡
ብእልፊ ኣእላፋት እናፈቐደት
ኡንኮ ብኡንኮ ትንፋስ እናቐረመት
ናብ ንፋስ ከምዘይቀየረት፡
ኣብ’ዛ ናይ ናይ ኢንተርነት ዓለም
ናይ’ዛ ዓለም ዕዳጋ መቐረት
ኣብ ውንጭሕቲ ምስ ቀረበት፡
ንምዕባለን ግስጋሰን መለክዒ ክትከውን
ብር ኢላ ምስ በዓል ዶላር ምስ ተሰርዐት
ኣቐዲማ ንጽባሕ ከምዘይሓለነት
ዓድን ዓውድን ክሳብ ዝኽዕብዋ ብቐትሩ ዝባዕዘዘት
ናቕፋ እንታይ ምስኮነት?
ኣቤት ብኡነት፡ ፈለማ ፍናን ናይ ናጽነት
ደሓር ኣይፈል ንባርነት ምስተጎልበበት፡
እንተ ብምፍላጥ እንተ ብገርህነት
ንታዕሪፋ ተኪኣ ዕዳጋ ምስ ወረደት
ብቐትሩ መሬት ኣድለቕሊቑ ሰማያት ከምዝተሰንጠቑ
ናይ መጻኢ ዕድል መግድዒ ክሳብ ትመስል
ብለቖታን ዘንቢልን ዝተመዝነት
ናቕፋ እንታይ ምስኮነት?
ውረድ ደይብ ድዩ ኣጊሙዋ
ናብ መርዓት ውሻጠ ዝተቐየረት፡ ናቕፋ
ወይስ ገና ብሕጂ’ውን ኣብ ጉሩምባኣ ትዓብጦ ምስጢራ’ለዋ?
ዳንኤል ተ/ዮ ተኽለጊዮርጊስ (01/26/16)
