![[AIM] Asmarino Independent Media](/images/logo/ailogo.png){kind=logo}
በሰላ!
በሰላ!
ኣብ ልበይ ዘላ በሰላ፡
እንዳ ኦሪክል ውትፊ’ላ
ብጎድኒ ቨንትሪክል ተቐርቂራ
ዝሓወት ትመስል ቀምሲላ፡
መውጋእቲ ፍቕሪ ምዃና
መዋዕልተይ እንተዘስተባህሉላ፡
ናይ ቅብጥሮት፡ መውጽእላዶ ብሮት
ወይስ ናየ’ንጸርጽሮት፡
ስምብራት ጥልመት ምዃና፡ ምእንቲ ክስቆራ
መውጽኡላ ሓበላ።
ኣብ ከርሰይ ዘላ ቂሐጽልሚ
በርቃዊ መጥቃዕቲ ናይ ዓሚ
ክሳብ ዘቕሕረኒ ክንዲ ትነዝዕ ትደሚ፡
እንተትቕምርር ክትሓዊ
ምመሓልኩ ሎሚ፡
ኣብ ስደት፡ ሕጓሕጓ’ንዳ ጓኖት
ተጠሊዐ ካብ ዘእዊ፡
ንዓመታ ክምለስ’ሞ ዓዲ
ኣሰር ኣቦሓጎይ ኖላዊ
ኣንጊሀ ክወፍር ክጎዪ።
ንመጋርያ ዓቢ ህድሞ
ክውልዓሉ ቀንዴል፡ ክኣጉደሉ ሓዊ።
ኣብ ግምባረይ ዘላ ውቃጦ
ሓደራ ዘለዋ ዝፈልጦ
መልእኽቲ ና’የደይ ዝሰንቆ
ከም መዓርን ጠስምን ዝብህጎ
ብሕልሚ ብጋህዲ ዘይጸግቦ
ኣብ ስደት ኣብ ከርተት
ምስ ሕሱም ናፍቖት፡ ዝኾነኒ ሓቦ።
ኣብ እንግድዓይ ዘላ በሰላ
ብረመጽ በደዊን ሓሪራ
ሓውል ንምባል’ሲ
ብጎዲብ ካራ ተፋሒራ
ሃመማ ምስ ደቆም ክስሕቁላ
ክሳብ መኣስ’ያ ከምኣ’ይላ?
ኣብ ኮለል ኣብ ከርተት፡
ንእስነት ኣሕሪራ
“እዚ’ውን ይሓልፍ”
ክቐርብ፡ መኣዲ ድራራ።
ኣብ ምዑጉርተይ ዘላ ማዳ
ጓሂ ምስ ሓዘን ድምቀታ
ርሑቕ መኣስ ኮይኑ ብልሓታ
ካብ ሰማይ ኣይኮነን ካብ ጎይታ
ካብ ባይቶ’ዩ ካብ ባይታ
ዝጥፍጠፍ ዝቑጸር፡ ክታብ መድሓኒታ።
ኣብ ልበይ ዘላ በሰላ
ካብ ዓመት ናብ ዓመት ምስጋራ
ጸበል ተ’ኾይና ስኢና
ትጽበ እነተ’ልያ ምህልላ፡
ምስ’ዛ ዓውደዓመት
ፓነቶነ ምስ ዱለትስ ይጽነሓላ፡
ንሓዲሽ ሂወት ክትጭንጉዓሉ ደም
ወ’ለ’ዝጊ ሕጻን፡ ካብ መባልዖ ማል
ቡቕቡቕን ዱዂዕን
ሓዊሱ፡ ሓመዱ’ንጸገላ።
ብዳግማይ ልደት
ነብሳ ትፈቕደሉ ድፍረት ይዓድላ።
ዳንኤል ተፍስዮውሃንስ (This email address is being protected from spambots. You need JavaScript enabled to view it.)
