Asmarino Fundraising: Because There Is So Much More to Be Done!

ደሞክራሲ ኣብ ኤርትራ!

ደሞክራሲ እንታይዩ መንነታ?
እስከ ዘርዝሩለይ መንገዳ ስርዓታ
ግልጺ ኢዩ ጠባያ: ሓቂ’ውን ቅናታ
መፈለምታ ዕርዕር ትብል: ደሓር ግን ዘይምኖ መቐረታ።
***
ደሞክራሲ ንኽትውለድ ብዙሕ’ዩ ጠለባ
ብስምዒት “ሆ! ምባል ቀሓር ልባ
መዕለቢኡ ዘይፍለጥ ጐልጐል ዲዩ እምባ
ቁም ነገር ስሒትካ ኰለል ጓል ዘረባ
ከምታ ዝተሓቝነ ልኻይ ዘይጽዕየላ  ኣልባ።
***
ትዕግስቲ ትሓትት ፍጹም ምጽውዋር
ሰላም ተስፍን ብስርዓት ምክብባር
ባህሊ ሓልዮት ትዅስኵስ ብሓባር ንምንባር።
***
ሓው ንሓውን ሓውትን ጨኪኑ ምስ ዚብድል
ደሞክራሲ ናይ ስልጣኔ ድንድል
ኣብ ፈተነ ይወድቕ ናይ ህላዌኣ ዕድል።  
***
ንዓይ ይጥዓመኒ ስስዕቲ ዘይብሉ
መሰል ርእይቶ ብሕጊ ዚኸብረሉ
ህዝባዊ ተሳትፎ ዘቐድም ካብ ኩሉ
ዚጸዓረ ፍረ ጻማኡ ዚረኽበሉ
ፍትሓዊ ስርዓት  ሰላም ዚሰፍነሉ።
***
ጥዑም ሽታኣ:  ጽሩይ ከም ማይ ንጕሆ
ትጽህዮ ብልሽውና ከይረክብ መስተርሆ
ብነጻ ፕረስ ንጸልማት ምልኪ ትብድሆ።
***
ደሞክራሲ ኢያ ዋልታ ናይ ብዙሓት
ምስ ዕቱብ ምኽባር መሰል ናይ ውሑዳት
ትኩርቲ  ጸረ ምልካዊ መንድዓት።
***
ፍቕሪ ሓቂ ካብ ልቢ ምስ ፈልፈለ
ዕምቈት ንቕሓት ኣዚዩ ምስ በሰለ
ድንቍርና ምስ ነተጐ ከም ዕንጕለ
ሓድነት ብመትከል ምስ ደልደለ
ባህሊ ምትሕልላይ ዳግም ምስ ማዕበለ
ኣዕኑድ ፍትሒ ብጽኑዕ ምስ ተተኽለ
ሽግ ሓርነት ብርሃና ምስ ገንፈለ
ሽዑ’ዩ ጽምብል ደሞክድራሲ ተሓምበለ።
***
ውሑድ እንተ ዘይጸንሓት ብዓመጽ ተቐቢራ
ደጊማ ግዳይ ምልኪ እንተ ዀነት ረኻቢት መከራ
ብደሞክራሲያዊ ሕጊታት እንዳባ ዝማዕረገት’ያ ኔራ
ንዘመናት ዘምበልበለት ፍትሓዊ ባንዴራ
ዘይርሳዕ ታሪኽ ኣሎዋ’ዛ ሓላል መሬት ኤርትራ
መስተርሆ ሓርነት ክትረክብያ ውዒላ ሓዲራ
ከም ተኽሊ ኣውሊዕ ክጥጥዕ’ዩ ዝተጋህሰ ክብራ።
***
ደሞክራሲ ትንሳኤኣ ቀሪቡ’ዩ ኣብ ኤርትራ
ዳግመ ሓርነታ ንዓለም ኣበሲራ
ሰላም ከተስፍን ንጽልኢ ቀቢራ
ድንቍርና ክትድርቢ ካብ ሱሩ ፍሒራ
መርከብ ምዕባለ ከተንሳፍፍ ጋንጽላኣ ገቲራ
ፍረ ጻዕሪ ክትምግብ ከም መዓር በርቢራ።
***
ክቡር ዝኽሪ ንስዉኣት!
ሓርነትን ራህዋን ሰላምን ንህዝቢ ኤርትራ!!

ዑቕባይ ገብረመድህን
ከምብሪጅ፡ ማሳቹሰትስ፡ ሰ.ኣ.
ለካቲት 1: 2012

 
BLOG COMMENTS POWERED BY DISQUS
 

Videos

Latest Comments

Announcements